Awor cu e videonan a plama rond...
- Mesun Peuterschool unda na 2022 baby a bira malo y fayece na Hospital
- E directora Neiffi Cecilia Kock-Sierra keto bay ta deteni
ORANJESTAD (AAN): E relato cu DIARIO a publica ya caba dia 3 di Juni 2023 encuanto detencion di e muher Neiffi Cecilia Kock-Sierra durante razzia teni na e ‘Pasa Dushi Pasa Pret Peuterschool’ na Wayaca 132, diripiente a haya mas atencion. Esey ta ora cu e siman aki riba social media, e videonan a cuminsa circula.
DIARIO a raporta na comienso di Juni, cu pa di dos biaha den 2 aña di tempo, e creche na Wayaca ta bolbe haye den spotlight scur, y cu awor a bira mas serio debi cu un investigacion penal cu a cuminsa wordo haci pa algun dia caba, a desemboca ora cu Ministerio Publico a duna luz berde pa detene dos persona di e Peuterschool aki, di cual uno di nan ta e directora.
Cu permiso di Fiscal, oficialnan hudicial di Jeugd- en Zeden Politie (JZP) di Cuerpo Policial Arubano a tene un razzia aki pa asina a confisca diferente material cu ta importante pa e investigacion, y a aresta tambe tres persona. Uno ta e directora di e creche di inicial Neiffi Cecilia Kock-Sierra di 53 aña. E otro ta su casa. Tambe a detene un trahador cu ta indocumenta, y a wordo pasa pa Guarda Nos Costa pa e wordo deporta. Por lo menos dos smartphone a wordo confisca entre e materialnan haya eynan.
Ta trata aki di e creche cu e nomber ‘Pasa Dushi Pasa Pret Peuterschool’, cu ta situa na Wayaca 132, net pariba di Clinica Veterinario Wayaca. Na Augustus venidero e creche lo cumpli 10 aña di existencia.
Caso serio: E biaha aki ta trata di un caso serio, unda un mucha cu ta ricibi cuido eynan, a sufri di maltrato severo na man di un of mas persona. Corectamente mayornan a pone Polis y e oficialnan hudicial di JZP na altura.
Ta ser mustra cu e prueba di mas severo y cu ta confirma e maltrato pisa di e criatura, ta e hecho cu tin video cu audio graba di loke a socede. Awendia Ministerio Publico no ta haci wega mas cu tipo di maltrato severo cometi contra muchanan menor di edad.
Y e siman aki ora pueblo a haya e videonan viral pa mira, publico a haya tristeza y tambe rabia na mesun momento. Con nan ta slang baby asina chikito cu “spray fuerte” di slang. Ni un cacho na cas mes bo no ta spuit cu un straal asina fuerte di awa.
Prome caso na 2022: E mesun creche aki na Wayaca tabata den luz negativo tambe caba na final di Maart 2022, ora cu un baby di apenas 4 luna a fayece eynan. Tabata un Diahuebs mainta cu yamada a drenta na Centro di Alarma, relaciona cu urgencia na e mesun creche di Pasa Dushi Pasa Pret Peuterschool. Ambulance Post na Wayaca Falls ta situa apenas 800 meter leu, pues den un frega di wowo a yega na e creche.
Ademas di Ambulans, e profesional di First Responder tambe a acudi, y aki nan a bin topa cu un baby cu no ta reacciona. Den pueblo el a bira conoci como ‘Baby Noah’. Polis tambe a yega, y nan a describi di a haya Paramediconan ta tratando di reanima e baby, y despues opta pa sali rumbo pa Hospital cune, y keto bay ta reanimando. Pero el a yega Hospital sin señal vital, y pa 9:21 am, Docter a constata morto di e baby di inicial N.A.O.E. di 4 luna.
E tempo ey a start un investigacion pa mira si e creche tin culpabilidad den su morto, como cu tabatin indicacion cu a bay laga e baby ta bebe for di e boter di tetero poni riba un cusinchi. E creche di su banda a reacciona bisando cu Baby Noah no a bebe tetero eynan, como cu e mainta ey pa 6:15 am (segun e tata), el a bebe lechi caba na su cas prome di yega creche. Despues a bin haya e baby no ta reacciona, y cu klompi di sanger banda di dje. Banda di 8:30’or a yama Centro di Alarma, y ya caba nan a cuminsa duna CPR. E doño y leidsternan ta bay curso cada 2 aña di CPR y Prome Auxilio.
Grito pa cera lugar: E direcora por blof cu e tin certificado di CPR y Prome Auxilio, pero e videonan awor ta demostra cu e cursonan di ‘Contacto Humano’ mes y ‘Baby Care 101’ nan no sa ningun patacá di dje. Pueblo riba social media a expresa furia total riba loke nan a mira den e videonan. Hasta docentenan di scol den tur nivel, a expresa nan repudio pa loke e ‘Leidsternan di Cracker Jack’ aki tabata haci cu e criaturanan.
Cera un criatura den un cashi y/of camber scur como castigo? Si acaso ta un mucha di 6 aña bay ariba kizas e por compronde e nocion di ‘haya straf’. Pero un mucha di 1 of 2 aña?
Den un otro articulo por lesa cu hopi yamada a drenta awe na Departamentonan di Gobierno, unda ta boga pa bay cera e lugar y prohibi e hendenan aki di habri algo similar, incluyendo e Leidsternan cu a durf laga tur esaki socede.
