E gobernacion mas dificil for di Guera Mundial ta wordo elogia
*Gobierno Wever-Croes ta entrega Aruba placa den caha di Gobierno
*Recuperacion den menos cu cinco aña despues di asalto di Covid-19
ORANJESTAD (AAN) — Na 2014 Aruba a conoce uno di su momentonan mas doloroso, ora mal maneho di placa di Pueblo, a haci cu Reino Hulandes mester a interveni y impone supervision financiero riba Aruba.
Pa evita cu e Pueblo Arubano cu a lucha pa su autonomia den Reino Hulandes, lo a cay den un abismo financiero, Hulanda a actua.
Ta den un situacion sumamente dificil, Aruba a drenta un epoca marca pa problemanan manera caida di turismo for di Venezuela, na momento cu e cielo priminti di Citgo, tambe a cay riba cabez di Aruba.
Cambio di Gobierno a base di e resultadonan di eleccion 2017, a pone e prome Gobierno Wever-Croes na mando di Aruba, cu no por a mira adelanta, kico por pasa cu un pais, cu ta crea debe manera tabata e base di Gobierno di Mike Eman.
Na 2020, na momento cu Aruba maneha pa Gobierno Wever-Croes a alcansa su prome cifranan basa riba bon maneho financiero cu un saldo favorabel, a wordo sorprendi pa e caida economico y financiero mundial, causa pa Covid-19.
Pa confronta e amenaza mortal di Covid-19 y evita hamber y miseria, Gobierno di Aruba cu no tabata tin reserva financiero, mester a haci prestamonan pa e por a sigui dilanti.
Na Febuari 2021, cifranan disponibel a indica, cu Aruba na 2020, despues cu e maleza a ataca, a perde 40 porciento, pues casi mitar di su entrada, y ya no por a cubri tur su gastonan.
No solamente Gobierno a perde su entrada na belasting, na momento cu e mester a cera su economia y exigi tur hende keda nan cas cu excepcion di e grupo cu trabou indispensabel.
Gobierno for di e momento mester a duna asistencia na negoshinan cu a sigui funciona sin entrada pa paga nan trahadornan.
Pasonan firme a wordo tuma dor di Gobierno Evelyn Wever-Croes cu na 2021 a gana eleccion a pesar di tur medida cu el a tuma.
Un plan oficial a wordo traha y Gobierno a reduci su gastonan pa asina Aruba por a sigui cana y habri portanan pa futuro di Aruba.
Na 2020, ora e pandemia a presenta, Aruba a wordo presenta cu e realidad di e mal maneho di crea debe a proposito dor di Gobierno Mike Eman.
Hulanda, pa medio di Raymond Knops, a papia na 2020 di un Aruba bancarota.
Awe, na 2024, e Gobierno Hulandes cu a critica Aruba, ta elogia Aruba, cu despues di e Pandemia tambe a wordo confronta cu e recesion mundial, pero a sigui cana pa un futuro nobo.
Mundo actualmente ta prepara pa recorda e forma cu na 2020, economia cu ta fundeshi di entrada pa hende, mester a cera su porta.
Na caminda pa 2025, ora lo recorda cu e prome lustro di e atake destructor di Covid-19, Aruba ta ricibi aplauso di e Comision di Supervision Hulandes, cu den un carta dirigi na e Ministro di Asuntonan Financiero, mr. Xiomara Maduro, ta splica con e cuarto relato financiero di 2023 ta duna prueba cu Aruba tin un saldo 282 Miyon den e sector colectivo loke ta haci cu Aruba ta cumpli cu e normanan financiero di Supervision.
Aruba a baha su gastonan di personal, cu tabata uno di e gastonan grandi pa Pueblo di Aruba y peso pa e pagador di belasting.
Awe e Comision di Supervision di Reino ta conseha Gobierno Wever-Croes pa uza e saldo positivo pa baha e debenan di Aruba.
Ora papia di baha debe mester comprende cu debe ta trece cune interes cu ta mas peso financiero pa e Pueblo di Aruba.
Na 2024, Aruba ta prepara pa recorda con na 2020, e mester a cera su economia y sin reserva debi na e maneho di abuso di placa di Pueblo cu a wordo hiba entre 2009 pa 2017 dor di Gobierno Mike Eman, na careda mara su mes na prestamonan pa asina Aruba por a sobrevivi Pandemia.
Awe menos cu cinco aña despues, Gobierno Evelyn Wever-Croes a entrega Aruba, placa cu ta resta den caha di Aruba cu asina por alivia e peso di debe cu Gobierno Wever-Croes a hereda!
Den menos cu cinco aña e opinion di Reino enfrente Aruba a cambia y hasta e Comision di Supervision, CafT, ta elogia e logro di Gobierno Evelyn Wever-Croes, e logro di Aruba na momentonan mas dificil den historia moderno mundial!
