Pueblo cuestionando fuertemente e tiramento Policial na Madiki Kavel

Security Video a divulga cu a los 18 tiro total

• Video a revela cu e hoben tabata core cu luznan cendi
• Violacion di reglanan di trafico no merece un castigo di morto 

ORANJESTAD (AAN): E prome informe cu Polis a duna di e tiramento cu a socede Diadomingo mainta trempan na Madiki Kavel, ta cu e hoben den e auto compacto Toyota Vitz color shinishi tabata coriendo ‘roekeloos’ y cu luznan paga.

   Esey a socede den area di Bubali cerca di Super Food, y asina un persecusion a start y cu a finaliza den Madiki Kavel, cerca di e Compleho di Recreacion di Madiki Kavel.  Na comienso hopi ta puntra pakico e chauffeur, esta e victima di 19 aña identifica como Ayden C. de Lanoy no a sikiera stop mesora, of kico.  A sali na cla cu e hoben aki ta un ex-alumna na e scol pa enseñansa special, esta Scol Soeur Juliette (ex-Emmaschool) na Ayo y hopi hende mes, incluyendo su coleganan na Save More, a describi e joncuman aki como un persona keto, trahador, no ta busca trouble, y recien a bira tata.  DIARIO a hasta haya comentario di un cliente, kende a describi e hoben semper como un persona servicial y leuk pa papia cune.

   Sinembargo tin algun hipotesis cu como ex-alumno di Scol Soeur Juliette, por tin cierto aspecto di su comportacion fisico den momentonan dificil, cu por presenta caracteristicanan cu hobennan ta bay den panico y no sa con pa reacciona ora cu diripiente tin Polis cu zwaailicht y sirena nan tras.

   E hoben pues, sin arma, y sin sa kico pa haci, a cuminza djis core pa asina purba elimina e ‘spanto’ y e ‘panico’ cu el a haye aden.  Algun ciudadano a hasta remarca cu kizas e no tin rijbewijs of otro situacion cu a pone purba di huy.  Pero hopi hende ta convenci cu el a djis drenta un estado di panico sin sa kico pa haci.

   Video a circula: Mientras tanto riba Dialuna, un persona a pone riba social media, copia di nan Security Camera ey den Paradijswijk.  Y e camera aki tin un mic poni tambe pafo cu ta capta sonido.

    Y e video aki graba anochi cu luz Infrared, a mustra tur hende cla y raspa cu e Toyota Vitz pasando den e caya, tin tanto luznan dilanti, y tambe e luznan patras cendi.  Esaki mesora ta pone duda den e prome declaracion di Polisnan e marduga ey.

   E video a sigui graba y na un distancia aparentemente e persecusion a finaliza, y bo ta tende Polis ta cuminza tira.  E agente NO a ni manda un tiro di advertencia, y esaki ta aceptabel ora cu tin peligro inminente riba bo.

   Loke a sigui despues ta algo cu a shock comunidad.  No menos cu 18 tiro ta wordo scucha, tras di otro, den exacto 5,3 seconde.  Esaki ta igual cu 3,6 tiro pa seconde.  Un bon tirador di e pistol Glock, por haci e peña bashi den 4,0 seconde.
   Pero asina hopi bala pa un hoben di apenas 19 aña di edad?  Un hoben cu no a comete atraco, no a caba di comete robo, ni tabata envolvi den ningun pelea.  Esey ta comentarionan cu a circula riba Dialuna.

   Pueblo a cuminsa describi esaki como un di e casonan mas grandi di abuso policial, y a cuminza usa mas y mas e palabra cu cierto Polis na Aruba ta ‘Trigger-Happy’, cierto Polis na Aruba ta gusta ‘Excessive Force’, y ta parce cu mas bien e Polis cu un ego asina grandi tabata kier a mata e hoben aki cueste loke cueste.

   Hasta algun persona a indica cu e investigacion aki mester move rapidamente, incluyendo envolvimento di esnan cu ta vigila Derechonan Humano, incluyendo e organizacion di Mensenrechten Nederland, como cu derechonan humano ta protehi pa leynan nacional y convenionan internacional.  E ta poni den Constitucion tambe.

   Damage control di KPA: Comentario di hopi hende ta cu e Security Video aki ta un golpi fuerte den wowo di Cuerpo Policial.  Pueblo awor ta haya sa cu e luznan tur ta cendi, y cu a los 18 tiro.  Algun hende hasta ta spera cu lo por tin Security Video cerca di e area unda e tiramento fatal a socede, pa asina mira si berdad e hoben a manda auto riba Polis of no.

   “Dios mio, increibel” tabata loke algun persona a reacciona ora di mira e video.  Lamentabelmente tin algun persona cu a bay demasiado leu den nan comentarionan, y a hasta cuminza lanza menaza den direccion di Cuerpo Policial.  Esaki a pone cu Cuerpo Policial mes, haciendo ‘damage control’ a emiti un declaracion pa indica cu nan tambe ta sintiendo e dolor di famia y e spotlight riba Cuerpo Policial, sinembargo a agrega cu KPA ta vigilando tur comentario riba Social Media y lo actua si esey ta necesario.  Riba un otro pagina den DIARIO awe por lesa e comentario di Cuerpo Policial.

   Polis ta pidi tur hende pa keda trankil y laga LandsRecherche sigui su pasonan di investigacion.  A lo menos spera cu nan no bin cu e excusa fofo cu e hoben tabata coriendo sin luz cendi, pasobra ya caba eynan a bin descubri cu Polis no a divulga tur e berdad na prensa y na pueblo.