Despues di campaña electoral dirigi contra Wever-Croes cu Ley di Integridad
*Mike a exigi pa Pueblo paga salario di delincuente den fraccion AVP
*Destructor financiero y sosten di scandal ta bira Prome Ministro Aruba
ORANJESTAD(AAN)—Un situacion sumamente serio ta presenta na Aruba, caminda mester investiga si personanan cu ta postula pa bira Ministro, no tin ningun problema cu Husticia pa nan por bira Ministro.
Unavez e proceso aki a termina, e partidonan Futuro y AVP lo por uni den un gobierno, cu como Prome Ministro e persona di Mike Eman, cu na 2017 a dicidi cu e mester a desaparece for di Aruba, cu el a laga atras den un caos total.
Riba tereno financiero, Mike Eman a manca Aruba pero ademas a destrui economia y porvenir di Aruba den cooperacion cu e dictador Venezolano, Nicolas Maduro, na momento cu Maduro tabata wordo busca na nivel internacional pa crimen.
Pero tabata tin situacion mas serio cu a keda atras, manera a rementa den cara di Aruba ora autoridad mester a actua contra scandal provoca pa exponentenan di AVP, partido cu den pasado ya a mira su dirigentenan wordo sentencia dor di Huez a base di corupcion gubernamental.
Con leu abuso di Aruba por a yega a keda splica cu e rapport Bo Aruba, cu Benny Sevinger a sconde den lachi na 2017 ora Mike Eman y su Gobierno mester a bay cas.
1.6 Biyon cu Mike Eman y Benny Sevinger a haya di Miembronan di Parlamento di AVP pa crea proyectonan cu Parlamento no por a control, awe ta peso di belasting pa Pueblo di Aruba.
Otro rapport cu ainda tin tur atencion di DIARIO, ta e rapport di Refineria cu a mustra con placa a lora den henter e set up di refineria hunto cu Nicolas Maduro.
Na 2017 Mike Eman a desaparece misteriosamente.
Aruba a bira fuente di berguensa gubernamental cu casonan manera di Paul Croes cu a bay prison, mientras investigacion a start di uno di e casonan cu mayor atencion den henter Reino, cu tabata e caso Avestruz cu Benny Sevinger como figura central, cu ta modelo di e forma cu por uza propiedad di Pueblo pa amigonan y personanan cu ta sostene partido cu placa, por a wordo beneficia.
E caso Avestruz a basha berguensa ariba Aruba y a afecta e reputacion y integridad di e pais.
Mike Eman, a duna sosten total na su amigo Benny Sevinger.
Aruba a cera conoci cu uno di e casonan mas sonante di criminalidad den e seno di partido AVP, cu a duna prueba con propiedad di Pueblo por a wordo uza durante un campaña electoral cu a entrega poder total na Gobierno Mike Eman 2.
Con abuso ta wordo haci di propiedad di Pueblo pa favorece familia y amigonan, a bini dilanti den e caso Avestruz, cu a manda Benny Sevinger prison hunto cu ciudadanonan cu a identifica nan mes como AVP den circulo directo di Mike Eman.
Placa criminal a lora den partido AVP cu Mike como dirigente di partido y Prome Ministro di Aruba, cu no por a mira kico su bon amigo, Ministro Benny Sevinger a haci cu propiedad di Pueblo.
Ora Huez a manda Benny Sevinger prison, Mike Eman a exigi pa asina mes, Benny Sevinger a sigui ricibi placa di Pueblo di Aruba den Parlamento, caminda Mike Eman y Benny Sevinger a yuda baha Gobierno Evelyn Wever-Croes cu mester a introduci medidanan pa Aruba no zink den e abuso financiero cu Mike Eman a comete contra Aruba.
Pueblo di Aruba a wordo humilia cu e lucha di Mike Eman pa su amigo intimo Benny, keda den Parlamento di Aruba y biaha y haci uzo di tur facilidad di un Miembro di Parlamento di Aruba.
Mientrastanto Mike a uni cu Gerlien Croes, cu un tempo a crea e impresion cu e no tabata di acuerdo cu Benny Sevinger den Parlamento pero despues a permiti e asiento cu Benny Sevinger aunke sentencia como criminal, baha Gobierno Wever-Croes y asina a habri caminda pa awe e por uni na Mike Eman pa forma Gobierno di Aruba.
Den e caso Avestruz a bini dilanti, con placa di amigonan di partido AVP durante gobernacion di Mike Eman, por a goza di beneficionan y e poder politico cu un votador pober no por paga, loke a resulta den castigo di prison, den un caso cu eleccion nobo a kita for di bista di Pueblo di Aruba.
Awe Evelyn Wever-Croes cu a implementa reglanan pisa contra corupcion, mester bay cas pa e hecho cu AVP a haya 240 voto mas cu MEP den eleccion.
Ta cu voto di Benny Sevinger, Gerlien y Mike entre otro por a orkestra final di Evelyn Wever-Croes como Prome Ministro y regreso di Mike Eman den Gobernacion.
Cambio di Gobierno di Aruba tin atencion internacional grandi pa e forma con un Gobierno cu a scapa Aruba di bancarota y a introduci un Ley di Integridad, a perde e bataya contra AVP, cu a zink Aruba den debe cu Pueblo mester paga mientras AVP a entrega prueba abiertamente cu e ta sostene un criminal, condena pa a ricibi placa di hende conoci den circulo di e partido berde, cu poder financiero cu e votador comun y coriente, manera ta e caso di mayoria di votadornan na Aruba, no tin!
Kico ta spera Aruba, ta e pregunta di informantenan cu ta puntra nan mes kico realmente ta wordo considera como integridad y decencia politico na Aruba actualmente.
