ORANJESTAD (AAN): Diamars mainta e grupo ‘Nos Kier Husticia’ a presenta na Gobernador, pa entrega un lista di firma cu nan a colecta.
Jeffrey Schuilenburg a splica cu nan a colecta mas cu 5200 firma contra huramentacion di Benny Sevinger como Parlamentario.
“Mirando e cantidad di firma, pueblo den 3 dia a responde masalmente”, segun Schuilenburg, kende a indica cu ainda tin mas firma cu ta bay ta drentando.
El a splica cu importante pa nota ta cu pueblo no ta acepta e tipo di comportacionnan aki.
“No ta algo normal cu un persona cu ta deteni ta bay huramenta y e pregunta ta kico esaki ta nifica”.
Bo ta saca un persona for di KIA bin cune aki, lage huramenta y hibe bek KIA.
Esaki ta algo cu no ta klop, sgeun Schuilenburg.
El a sigui bisa cu esey ta locual henter pueblo a rechaza.
“Cu tur respet pa e 1600 hende cu a vota pa Sevinger, mi ta kere cu e mensahe ta ‘loud and clear’”.
DIARIO a puntra Schuilenburg si esaki ta nifica cu e ley di Parlamento mester wordo cambia, mirando cu e ley ta permiti pa un preso huramenta como Parlamentario.
El a bisa cu e ley mester a wordo cambia caba, mirando cu aña pasa fraccion di MEP kier a cambia e ley di screening di Parlamentarionan y cu esaki a wordo rechaza pa fraccion di AVP.
“Awor nos ta wak pakico AVP a rechaza e ley aki y mi no ta kere cu ta husto pa pueblo di Aruba pasa den e berguenza aki”.
Benny mester keda cla cu su asuntonan di husticia y e ora ey por wak si e por bin bek, segun Schuilenburg.
El a haci un apelacion na lider di AVP Mike Eman, pa e pone otro persona di e lista como Parlamentario, te ora keda completamente cla cu e caso penal contra Benny Sevinger.
“Ojala e por sali liber y bin bek, pero aworaki nos no ta bay tolera e tipo di cosnan aki cu ta trece berguenza pa nos isla”.
