Resultado original di eleccion 2021 lo ta constelacion nobo di Parlamento for di mañan - *Decision den Corte ta deshaci di necesidad di caso pa reconteo di voto - *Atencion pa tension cu huramentacion di Benny Sevinger por ocasiona
ORANJESTAD (AAN): A bira conoci cu Partido AVP a entama un caso sumario, den e caso aki contra Conseho Electoral, pa pidi un reconteo di votonan invalido pa loke tabata e eleccion di dia 25 di Juni ultimo.
A pidi un asina yama 'ordermaatregel' (medida temporario) pa para e destruccion di e stembiljetten di eleccion.
Diamars, hues a rechasa e peticion di Partido AVP pa loke ta e no destruccion di e stembiljetten, pendiente ainda e caso sumario relaciona cu e reconteo di votonan invalido.
Hues no a mira cu motibo pa stop e destruccion di e stembiljetten y tampoco ta mira necesario un reconteo di votonan.
Esaki ta nifica cu e caso sumario cu Partido AVP a entama tampoco lo tin su rason mirando cu hues no ta haya necesario un reconteo di votonan di e eleccion recien.
Informantenan a indica na DIARIO, cu reconteo di voto lo por causa problema pa salida di e constelacion nobo di Parlamento, cu ya ta tuma luga den un situacion sumamente tenso.
Expertonan ta indica cu e proceso electoral di Aruba ta basa riba transparencia.
Ademas mester tene na consideracion cu AVP mes a stroba introduccion di e ekipo pa vota via ekipo electronico cu lo a evita e loke awor AVP kier uza pa pone duda na e resultado di eleccion
Mientrastanto DIARIO a comprende cu ta tene na consideracion tambe cu e huramentacion di Benny Sevinger tambe por provoca tension y autoridad ta prepara pa tur situacion y ta tuma tur medida necesario.
