ORANJESTAD (AAN) – Manera DIARIO a trece dilanti caba den edicion di Diahuebs, hecho ta cu Dump di Parkietenbos lo bay cera na 2023.
Mainta durante conferencia di prensa di Gobierno, Minister Ursell Arends, titular di Transporte, Naturaleza y Medio Ambiente, Integracion y Asuntonan di Adulto Mayor, a elabora riba tocante e tema: “Dump ta bay cera. Kico e lo cambia pa bo y pa bo desperdicio?”
“Cambio ta cuminza, na cambia nos mes. 70 aña di historia dera bao di un seroe, cu nos por mira for di cualkier punto halto, aki na Aruba”, e
dignatario a expresa pa cuminza elabora riba e tema.
El a splica cu tanto un sinfin di productonan kimico, un santana di industria y materialismo cu ta pusha Aruba su economia te caminda e ta awe, tin eynan, “pero na mesun momento nos a faya di no realiza e delito di nos actonan”, segun e mandatario.
“Nos a faya di no a actua hopi mas lihe di con nos a maneha e sushi. Den ultimo decadanan, hopi a purba, a priminti, a papia, a bringa y a lucha. Un lucha notable, sigur cu algun ciudadano a hiba pa nan mesun derecho di ta liber y saludable, den nos cas y den nos pais”, Minister Ursell Arends a expresa.
El a sigui, bisando cu e fayo di Parkietenbos ta refleha tur Aruba su pasado, pero mester keda pa pasado tambe, pa asina realiza e esfuerzo di un miho futuro.
Minister Ursell Arends a informa cu dia 31 di December ta ultimo dia cu dump di Parkietenbos ta habri pa publico. Esnan cu ta eherce e trabao di hardinero of contratista, y ta gusta traha den su cura y hiba su sushi, of di su bisiña, na e dump di Parkietenbos, desde 1 di Januari lo tin diferente opcion caminda e ciudadano mester hiba su sushi.
“Algun lo ta gratis cu cierto condicionnan manera residencial green ways y algun lo por hasta genera placa pa bo, manera metal of wacharaca. Y sigur tin algun cu lo costa nos algo, manera tire y tambe e bulk waste”, e mandatario a indica.
“Bulk waste” ta materialnan cu ta rekeri un tiki mas y ta mas complica pa wordo procesa, y mas cu tur cos ta rekeri un tiki mas tarea pa por separa nan, segun e mandatario.
El a agrega cu na mesun momento ta pa acepta cada ciudadano su responsabilidad pa cu su desperdicionan. Minister Arends a subraya cu e conferencia di prensa aki tabata pa informa e pueblo y alavez brinda trankilidad cu mayoria di pueblo lo no sinti efecto di e ciere di dump. “E ta un paso chikito, pero e ta un salto grandi pa nos proximo generacionnan”, Minister Ursell Arends a remarca, agregando cu e sushi cu ta wordo genera no ta propiedad di gobierno pero si, gobierno tin e responsabilidad y deber, pa facilita cu esaki por wordo procesa debidamente.
