Pueblo a responde positivamente pa cu Vacunathon

ORANJESTAD (AAN): A mira cu toch ainda varios hende di edad grandi a dicidi na finalmente bay busca nan vacuna contra Covid-19.  Varios persona a keda warda pasobra

nan tabata haya informacion incorecto y falso di e vacuna.  Pero mirando cu miles di hende na Aruba ya a ricibi nan dosis, sin ningun problema, awor nan ta bay tambe pa inmuniza nan mes.

   E biaha aki e reaccion tabata grandi na tur cuatro Centro di Vacunacion.  Tanto na e Ballroom di Ritz-Carlton, como tambe Centro Deportivo Betico Croes na Santa Cruz tabatin yen hende, y rij largo a forma pafo.  Pero e tabata bay rapido sin cu mester a keda warda hopi.

   E vacuna a wordo duna na un forma profesional y servicial.  A keda demostra cu Aruba a responde na e yamada pa bay vacuna.  Sin duda alguno por bisa cu e Vacunathon ta un exito grandi.  Riba potretnan aki por mira mas di e dianan special pa vacuna.