Den cuadro Luna Nacional Contra Abuso di Mucha
ORANJESTAD (AAN): Uniendo na e lucha y conscientisacion mundial di e problema serio di abuso y abuso sexual di mucha, Gabinete Wever-Croes II a decreta luna di April como Luna Nacional Contra Abuso di Mucha. Ya durante e siman tras di luna, a tuma nota di movecionnan di diferente instancianan riba e tema aki.
Prome Minister Evelyn Wever-Croes, den nomber di Gobierno di Aruba ta pidi tur ciudadano pa sigui compromete nan mes y uni den e lucha pa proteha nos muchanan, percurando asina pa nada malo pasa nan y ofrece nan tur clase di amor y cariño pa asina nan por crece feliz y bira adultonan cu por carga e pais aki.
Relaciona cu Luna Nacional Contra Abuso di Mucha, luna di conscientisacion, Fundacion Mi Voz ta bo Voz, Comision Nacional di Abuso Sexual di Mucha y Gobierno di Aruba ta presenta charlanan informativo: Conscientisacion y Prevencion di Abuso di Mucha. E anochinan informativo aki lo cuminsa di 7:00 pm y finalisa pa 9:00 pm, y lo tuma luga riba e siguiente fecha y localidadnan di MFA durante luna di april.
-Diahuebs 11 di april, MFA Noord.
-Diahuebs 18 di april, MFA Paradera.
-Diahuebs 25 di april, MFA Savaneta.
-Diamars 30 di april, MFA Santa Cruz.
E oradornan cu lo brinda informacion e anochinan di charla ta profesionalnan na Aruba cu ta trahando cu y tratando casonan di abuso di menor den nan diferente areanan di trabao. E oradornan ta: Drs. Melva Croes-Yanez, NeuroPsycoloog; Dr.Audrey Khan, Klinische Psycoloog; Señora Magali Maduro, Directora Bureau Sostenemi. Señora Omaira Britten, Poeta.
E anochinan informativo aki lo brinda informacionnan clave riba con pa reconoce e señalnan di abuso sexual di muchanan; e impacto riba e victima y famianan; y con cada ciudadano por hunga su parti den prevencion y intervencion. Partisipando den e eventonan aki, bo no solamente ta habilita bo mes cu conocemento riba e tema aki, pero tambe bo ta contribui na un cultura di conscientisacion y proteccion contra abuso sexual di muchanan. Huntu, laga nos uni forsa den nos compromiso pa proteha e bienestar y dignidad di cada mucha na Aruba.
“Ban uni den e iniciativa vital aki pa aumenta conscientisacion y combati e problema alarmante di abuso sexual di muchanan. Cada mucha merece un ambiente sigur y cuido, liber di e menaza di abuso y explotacion. Desafortunadamente, abuso sexual di muchanan ta keda un problema persistente mundialmente, incluso den nos mesun comunidad y hogarnan na Aruba. Ta esencial cu nos uni nos forsa pa educa nos mes, proteha nos muchanan, y traha pa crea un futuro mas sigur pa nan”, Prome Minister Evelyn Wever-Croes a expresa.
