A lansa e website Aruba Showcase pa productonan local

Minister Geoffrey Wever:

ORANJESTAD (AAN):  Fin di Maart den un ambiente ameno na Sun Plaza Minister di Asuntonan Economico, Comunicacion y Desaroyo Sostenibel Geoffrey Wever hunto cu DEACI y Expodesk a lansa e webpage yama Aruba Showcase (https://www.exprodesk.com/showcase-products/).

            Un pagina specialmente pa nos entrepreneurs local. Riba e pagina aki productornan local tin e oportunidad di por showcase nan productonan pa por exporta esaki.

            Durante e evenemento tabata tin diferente stands cu producto nan local pa admira cu ya caba ta obtenibel riba nos mercado local manera Chocolati, Pica, Biña, Souvenirs, Arte y mucho mas. Esaki ta un muestra cu nos tin diferente hende local cu ta produci productonan localmente.

            “Mi ta contento di por mira diferente entrepreneurs local cu nan productonan para aki awe”, Minister Wever a cuminsa ta bisa, “Cu e website aki nos kier crea un plataforma unda tur esnan cu tin un producto produci aki na Aruba por showcase nan producto.”

            E plataforma aki tambe ta parti di e vision di Minister Wever pa duna nos entrepreneurs local e sosten y tools necesario pa ta mas exitoso posibel.

            Minister Wever a termina ta gradici e team di DEACI y Expodesk pa e tremendo trabow desplega.

            Minister Wever kier a encurasa tur esnan cu tin un producto pa tuma contacto cu Expodesk pa asina nan tambe por show case nan producto riba e Plataforma nobo aki completamente gratis.