ORANJESTAD (AAN): Semana Santo ta momento cu hopi hende ta bay campa,
pa asina pasa dia na lama, goza di beach, y haya chens di combersa, interactua, y tambe hunga cu famia- y amigonan.
Manera esaki cu DIARIO a topa cune na e beach di ex-Bushiri Hotel. Un grupo di famia y amigo a busca un mesa, pa asina habri un wega di ‘Mens Erger Je Niet’ riba dje. E wega clasico aki tambe ya pa hopi decada ta forma parti di campamento na Aruba.
Manera por mira aki, e cabayero cu poloshirt blanco cu sombre riba cabez, ta hungando cu peonnan color geel, y e tin ya caba 3 peon den final di cas. Un peon e tin ainda na caminda pa asina trata na finalisa e wega.
Por a mira cu peon berde tin un so den cas, mescos cu peon cora cu tambe tin 1 so den cas. Pero e peon blauw e momento ey tin ningun den cas, ningun riba borchi, pues tur ta wardando pa sali ainda.
Tanto participantenan masculino como femenino ta combina e gozo di e brisa dushi di aire, cu sonido di olanan na oriya di lama, y cu algo ‘frieu’ den man, pa usa tactica y strategia pa e wega di Mens Erger Je Niet.
