Prueba con esposo di Marisol ta cobra Serlimar!

Mientras situacion na DIP y maneho tereno ta tene Pueblo di Aruba ocupa - *Factura di compania di esposo di Marisol na Serlimar pa mas cu 270 Mil Florin - *Pueblo tin derecho pa conoce tur beneficio y pago na famia di Marisol

ORANJESTAD(AAN)—E aparato gubernamental a wordo introduci pa maneha propiedad di Aruba y pa atende cu interes di Aruba. Segun leynan basico di Aruba, hamas por ta asina cu tin secreto pa Pueblo kende ta haya kico di Gobierno.

Leynan basico di Aruba hasta ta scrap relacion familiar den Parlamento pa asina evita cu bienestar di Aruba por ta na peligro.

Tur documento, tur loke pasa na Aruba cu placa di Pueblo, mester ta conoci pa Pueblo cu mester wordo sirbi cu bon trabou di tur departamento di Aruba.

E siman aki, e forma con Marisol Lopez-Tromp a atende cu asuntonan di su famia pa cuminsa cu Cas di Madushi te awe cu tereno pa su ruman den pandemia, a haya tur atencion sigur si tene na cuenta cu top di Partido MAS ta mara na e relacion familiar entre Marisol y Lelicia cu a haya un tereno den tempo record.

Ayera e desaroyonan na DIP, cu ta keda den atencion di autoridad y cu por bira fuente di un caso nobo, a keda discusion di Pueblo.

Un ciudadano a splica DIARIO con for di 2005 (tempo cu Marisol a uza 600 Mil florin pa brug di Madushi) ya el a entrega un peticion pa haya un tereno patras di su cas pa e planta.

E gastonan pa haci e sitio un luga caminda por planta, tabata subi pasobra mas mata tabata crece riba e tereno en cuestion.

E peticion a bay tempo cu Marisol tabata Ministro y cu e Gobierno di e tempo tabata bisa cu lo a duna tereno pa plantacion. Pero e tereno no wordo otorga.

E ciudadano no a perde speransa, pero a manda peticion pa Benny Sevinger na 2012, na 2013 y na 2015. Nada a pasa. Na 2018 a acerca Otmar Oduber como Ministro y finalmente Marisol tambe a wordo acerca pero sin resultado.

E ciudadano a keda cu speransa pasobra semper ta bisa cu e asunto ta casi cla.

Esaki a haci cu el a gasta Miles di Florin pa roza e tereno cu el a dicidi di cera tambe pasobra cabrito ta subi e tereno y ta come tur loke e planta en espera di e tereno oficialmente.

Te awe e ta warda pa awor tende kico a pasa na DIP, caminda segun informacion autoridad a confisca ekipo den investigacion di otorgamento di tereno.

E caso lo no ta data di tempo di Benny Sevinger y lo no ta parti pues di Avestrus. Ta wordo papia di terenonan huurgrond cu a wordo otorga y aparentemente ni pandemia lo a stroba un que otro na Aruba na 2020.

Mientras ta wordo papia awor di un escandalo Warawara den asuntonan di tereno, informantenan ta mustra cu Marisol Lopez-Tromp sigur mester papia cu Aruba riba asuntonan cu ta relaciona cu Serlimar.

Prueba a wordo entrega na DIARIO y ta wordo publica awe di facturanan den cual e oficina di esposo di Marisol Lopez-Tromp ta cobra Serlimar pa servicio cu a wordo presta.

Pues esaki ta nifica segun informantenan cu esposo di Marisol Lopez-Tromp tin un relacion cu Serlimar y manera uno di e pruebanan di awe di DIARIO ta indica, a recorda e ex Director di Serlimar, Davelaar, cu mester paga su negoshi e suma di mas cu 270 Mil florin.

Ta trata di un suma no abou pa servicionan cu e compania di e esposo di Marisol Lopez-Tromp a presta na Serlimar y cu awor ta uni na e lista di preguntanan cu Marisol Lopez-Tromp debe Aruba.

E prueba ta mustra cu e esposo di Marisol Lopez-Tromp mes a recorda cu e mester ricibi placa di Serlimar. DIARIO ta sigui cu su investigacionnan.

Mientrastanto Aruba ta keda pendiente pa loke ta pasa na DIP!