Mas sushi politica barata no por a bira den porta di un eleccion crucial - *Un hende cu realmente stima un mucha, ta keda leu di e basura di oposicion
ORANJESTAD(AAN)- Ya na 2018, DIARIO a lanta para pa pone un fin na e cortina di huma cu oposicion di AVP a crea pa sconde e desastre como nan gobernacion 2009 pa 2017.
Awe hunto cu Arubianonan decente, cu a protesta pa loke atrobe ta pasa, DIARIO mester analisa e produccion final di oposicion di Aruba, cu no por a logra cu wega sushi y actuacion barata pone un fin na Gobierno Wever-Croes.
Loke ta pasa na Aruba actualmente no tin palabra. Mas sushi politica barata no por bira.
Aruba awe a spera di su politiconan cu kier tuma mando di Aruba, cu nan lo a bini cu hechonan concreto pa demostra cu nan por traha miho cu Evelyn Wever-Croes cu hunto cu Hulanda a scapa Aruba for di e desastre total cu dos Gobierno Mike Eman a crea.
Ta tristo cu awor cu AVP no ta logra pa convence pueblo cu e merece confiansa di Pueblo, e partido ta haci uzo di e arma di mas sushi cu ta existi, cu ta uzo di dolor di un mucha inocente.
Si un hende realmente stima mucha y ta preocupa cu bienestar di un mucha, ta keda leu for di e loke sigur mester considera como basura di oposicion.
Corte di Husticia a cera porta pa loke a pasa ora el a dicta sentencia. Pero mester sigui corta, mester sigui causa dolor, pasobra pa AVP (manera awe ta keda proba) ta voto so ta conta y si mester destrui hende ta haci esaki tambe.
Awe si nos ta bay directamente contra e wega barata cuj yiu di un candidato di partido MEP. Si un hende realmente tin sikiera respeta humano pa e mucha, no ta crea un situacion doloroso publico pa un criatura. Un hende cu realmente ta stima e mucha aki, no ta sigui hinca e storia aki den publicidad pa AVP haya voto.
Nos no kier mishi cu e balornan cu sigur e gran mayoria di hende cu nos conoce como parti di AVP y democraticamente ta parti di Aruba cu curason Arubano.
Pero si nos ta bay contra hipocrecia di uza un inocente, di abusa di sentido di moral di un Pueblo, pa haya voto.
Que va!
Barata y sushi ta e wega pa kibra futuro di un inocente cu no ta produci voto pero si repudio pa e politica di AVP!
