Proyectonan PPS mester bira debate special pa eleccion

ORANJESTAD (AAN) — Pa pueblo na e momentonan aki e informacion mas importante cu e kier ricibi ta, kico a pasa exactamente cu su placa y pakico e pais a conoce e crisis financiero cu ta kibra su futuro.

Manera DIARIO a splica durante e ultimo dianan aki cu luho di detaye, hasta e Comision di Supervision Hulandes, a mustra riba e sumanan enorme cu a wordo gasta den proyectonan cu Aruba no por a paga y a wordo financia a base di e sistema pa paga despues.

A wordo mustra na DIARIO cu e rapport di Bo Aruba no tabata e unico rapport cu a wordo traha riba e topico aki pero cu Algemene Rekenkamer Aruba a considera necesario pa bini cu un rapport mas riba Watty Vos Boulevard y Green Corridor.

Segun informantenan experto di DIARIO e momento a yega pa tur instancia envolvi den e proyectonan  bini hunto y splica Pueblo di Aruba, con e proyectonan aki a wordo planifica y con a establece e prioridadnan den e rapportnan aki.

Segun informantenan no por ta, cu ainda partido di Mike Eman y Benny Sevinger (hasta den e problema cu e ta actualmente cu Hues) ainda ta kere nan por papia di e proyectonan aki, segun rapportnan oficial hunto nan a ehecuta.

Ta Mike Eman y Benny Sevinger segun Algemene Rekenkamer Aruba directamente tabata ocupa nan mes cu e proyectonan, cu tabata wordo ahusta continuamente manera nan tabata haya necesario.

E miembronan di Parlamento di AVP cu tabata mayoria, a duna nan ciegamente e oportunidad pa hunga cu e 1.6 Miljard Florin di Aruba cu manera Hulanda awor ta indica, mester paga te na 2043 e debe, cu na e momento aki ya a bira 82 Miyon anual.

Informantenan a indica cu Aruba prome cu eleccion 2017 no por a discuti loke tabata pasa cu e proyectonan aki pasobra Benny Sevinger a percura pa e rapport no por wordo entrega oficialmente na Parlamento dor di Algemene Rekenkamer Aruba.

Pero awor Pueblo kier sa pakico Gobierno Mike Eman cu tabata na haltura cu e tempo Aruba no por a paga e proyectonan y no tabata tin ningun sigura cu awe si Aruba por paga, a dicidi pa saca tanto placa.

Informantenan ta puntra nan mes si Mike y Benny ta bay cumpra cas y auto cu nan no por paga den nan bida personal y pakico nan a hinca Aruba den e debe grandi aki.

Expertonan ta considera cu awe Mike Eman, cu no tabata den Parlamento pa contesta pakico el a dicidi pa e proyectonan di e forma costoso cu el a haci esaki, mester presenta publicamente cu expertonan independiente di entre otro Algemene Rekenkamer Aruba pa splica Aruba kico el a haci cu placa di Aruba, cu awe conoce cantidad di structura cu companianan cu Mike Eman y Benny Sevinger a selecta, a haya placa di Pueblo pa construi.

Aruba awe mester haya informacion concreto segun informantenan riba tur compania cu a haya placa den e proyectonan aki y tur informacion pakico a dicidi pa tanto viaduct, tanto rotondo cu waterval caminda adictonan por bay landa, mientras tabata conoci cu Aruba no tabata tin placa.

Informantenan a mustra cu no ta usual pa Algemene Rekenkamer saca dos rapport na 2018 y na 2019 riba e mes tema pero treciendo dilanti e riesgo halto cu nan tin pa Aruba y e sumanan enorme di Aruba.

Pueblo mester haya sa pakico Mike Eman a bay hunga Sinterklaas manera informantenan a bisa y kende a benefiai di loke Sinterklaas a permiti pa nan haya como beneficio.

Den e prueba di awe por mira con den e segundo rapport di Algemene Rekenkamer Aruba riba e tema aki, ta bisa cu Gobierno actual a coregi e maneho cu tabata tin na man di Gobierno anterior y tambe ta refleha e riesgo enorme di e proyecto aki.