Proyecto ‘Zona di Desperdicio’ a bira un realidad

ORANJESTAD (AAN): Dialuna mainta tabatin inauguracion oficial di e iniciativa Aruba Limpi, e proyecto Zona di Desperdicio na Barcadera. 

Un paso importante den direccion di un isla mas limpi, bunita y agradabel pa biba y bishita.

   Durante e ceremonia oficial na Ecotech na Barcadera, Premier Mike Eman a enfatisa e importancia di e proyecto pa trece mehora den calidad di bida di nos comunidadnan y ofrece un solucion practico pa un necesidad cu hopi famia ta enfrenta.

   E discurso tabata memey di diferente invitado, e.o. Ronella Croes, CEO di ATA, Minister Cicilia,  representantenan di ATA mes como tambe Ministerio di Asunto General, Medio Ambiente, Naturelsa y Cultura, Ministerio di Turismo, Transporte y Labora, varios ehecutivo di Ecotech, como tambe personal di Bureau City Inspector.

   Segun Eman, pa hopi ciudadano e costo y dificultad di deshaci di sushi ta representa un reto real. Cu e proyecto Zona di Desperdicio, e residentenan ta haya un alternativa accesibel y practico pa deshaci di sushi di un manera responsabel, contribuyendo directamente na limpiesa di nan cas, bario y comunidad. “Hopi famia ta haci gran sacrificio pa cubri nan gastonan diario.

   Ora cu un persona mester asumi gasto adicional pa deshaci di desperdicio, esey por bira un carga extra den nan cartera. Cu iniciativa aki a crea un solucion practico cu ta contribui na dignidad y calidad di bida di nos pueblo,” Prome Minister Eman a declara. E proyecto Zona di Desperdicio ta sigui riba e impulso crea door di e diferente edicion di Baki den Bario organiza durante e ultimo aña rond di varios bario riba nos isla.