Hopi ciudadano no ta realiza bon e consecuencianan legal di nan accionnan

ORANJESTAD(AAN): Durante e premiere di e pelicula Otro Banda di Lama, parti di lanzamento di un campaña contra trafico humano,

Keten Manager pa e problematica di migracion di Venezuela, Gina Lopez, a hiba palabra Dialuna mainta.

“Como Keten Manager mi rol na inicio tabata mas pa yuda coordina e peticion pa e fondonan y atende cu e impacto di e crisis migratorio”.

Hunto cu e diferente instancia y departamentonan, a dedica oranan largo pa por identifica y planifica diferente proyecto presenta basa tambe riba e prioridadnan, pero tambe riba e efecto cu implementacion di esaki lo por tin riba e situacion di e crisis migratorio, segun Lopez, kende a indica cu a tuma varios luna y hopi ora di trabao pa hinca esaki den otro den e formato indica y na final  a haya aprobacion pa implementacion.

El a splica cu 41 proyecto a keda comparti den dos diferente  categoria.

“Bao di cada un di e 41 proyectonan ey, tin un cantidad grandi di sub proyecto cu tur nan specificacion, retonan y actualmente por bisa cu mas cu 80% di e proyectonan ta den proceso di ehecucion, of ta kedando finaliza”.

Lanzamento di e campaña di awe ta un di e proyectonan cu tin un duracion di mas o menos 1 aña y ta inclui tur e facetanan di un campaña di mercadeo y un campaña di informacion, pero tambe e tin un otro parti hopi importante, esta un pakete educacional pa studiantenan riba nivel secundario y universitario, segun e Keten Manager.

El a splica cu ta hopi importante pa incorpora e grupo specifico aki, pasobra riba un base annual un grupo grandi di studiante ta continua cu nan estudio avanza den exterior.

Segun Lopez, ta importante pa nan tambe ta alerta di e señalnan di posibel traficacion y contrabando di hende sea pa nan mes of pa esnan rond di nan.

“Hunto cu CMMA a traha un campaña di concientizacion cu enfasis riba e parti di trafico humano y contrabando di hende”.

Ademas di esaki e biaha aki banda di e informacion a incorpora e parti huridico den dje.

Aspectonan manera kico ta e consecuencianan pa un persona, si por ehempel e persona huur su cas na un persona cu no ta legal na Aruba.

Tur hende mester tene cuenta cu con nan ta kibrando ley si nan encurasha y coopera pa yuda migrantenan drenta Aruba na un manera ilegal.

Tambe mester tene cuenta cu e consecuencianan legal si bo duna un persona indocumenta un trabao, segun Lopez.

El a sigui bisa cu hopi ciudadano no ta realiza bon e consecuencianan legal di nan accionnan y e efecto cu esaki lo por tin riba nan futuro.