Proyecto piloto di Bodycameras pa cuerpo policial ta bay cuminza

Ministro Rocco Tjon:

ORANJESTAD (AAN): Dialuna mainta, durante conferencia di prensa di Gobierno di Aruba, Minister di Husticia y Asuntonan Social sr. Rocco Tjon, a anuncia e inicio di e proyecto piloto di bodycameras pa henter Cuerpo Policial di Aruba.

   Manera ta conoci, a base di e plan di maneho di Ministerio di Husticia y Asuntonan Social, deliberadamente a scoge pa inverti den tecnologia. Tecnologia pa eleva siguridad pa henter comunidad, pero tambe pa e Agente Policial mes. Asina, a base di diferente investigacionnan cientifico a yega na e conclusion pa bin cu e proyecto piloto di bodycameras pa e Agentenan Policial, di cual lo haci un evaluacion dentro di tres pa seis luna, pa asina mira su efecto y tuma un decision si ta bay implementa esaki permanentemente.

   Manera ta conoci a inverti hopi den camaranan y sistemanan sofistica entro otro e sistema di radar pa asina por eleva siguridad na nos frontera. Ademas, a inverti den e proyecto di ICT pa Cuerpo Policial, pa asina nan por eherce nan trabao mucho mas miho y na mes momento brinda un miho servicio na comunidad. A scoge tambe pa inverti den tecnologia pa por inverti den e siguridad di e Agente Policial mes, como tal, un otro proyecto cu ta andando ta, e mobile dataterminals cu lo bay worde instala den e vehiculonan nobo pa Cuerpo Policial.

   Cientificamente a keda proba cu, e uzo di bodycameras ta influencia e comportacion di e ciudadano. A base di diferente investigacionnan cientifico cu a worde conduci na Merca, Inglatera pero tambe na Hulanda, a indica cu esaki ta trece mas siguridad pa e Agente Policial. Banda di esaki, e kehonan cu ta worde entrega contra di e organizacionnan policial, particularmente e Agente Policial, ta baha cu alrededor di 88% den cierto organizacionnan policial na Merca. Organizacionnan na Inglatera a mira un reduccion di 60% pa loke ta uzo di agresion contra e Agente Policial, como tambe un reduccion significante pa loke ta e “use of force” di parti di e Agentenan Policial.

   Particularmente, pa loke ta e investigacionnan cientifico cu a worde conduci na Hulanda, a conlcui cu, pa loke ta e comportacion contra e Agentenan Policial, esaki tin un tendencia di disminucion. A base di un encuesta cu a worde haci na e Agentenan Policial aki cu ta uza bodycameras na Hulanda, a conlcui cu nan ta sinti nan mes hopi mas sigur y e agresion contra e Agente Policial tambe ta hopi menos. Un otro aspecto importante di e bodycamera, ta e hecho cu e imagennan aki por worde uza pa ora cu mester presenta un caso dilanti huez, pa asina proteha e Agentenan Policial.

   A base di e informacion for di investigacionnan cientifico cu a worde haci na diferente otro pais, Alto Comisario a haci un sondeo den Cuerpo Policial di Aruba, y asina a tuma un decision di cua ta e ekiponan y districtonan cu ta bay worde ekipa cu e bodycamaras pa cu e proyecto piloto. Pues, hunto cu Setar, a scoge pa adkiri 28 camara pa asina e diferente ekiponan por worde ekipa cu e bodycameras. Prome cu e bodycameras worde introduci, Alto Comisario lo bay percura pa e maneho di esaki worde stipula, pa asina e Agentenan Policial por sa con pa uza esaki, con e imagennan ta worde warda, na ki momento nan ta worde uza, y ki ora nan por worde proporciona.

   Pa conclui, e Mandatario a indica cu e ta sumamente satisfecho pa por inicia e proyecto piloto aki, hunto cu Setar N.V., caminda despues di tres pa seis luna esaki lo worde evalua pa asina tuma un decision si esaki ta bay worde implementa permanentemente den henter Cuerpo Policial. Palabranan di pabien na henter Cuerpo Policial y Setar N.V. pa e inicio di e proyecto piloto aki.