Tyson Lopez ta splica:
ORANJESTAD (AAN) -- pa loke ta trata e actividadnan cu bishitantenan ta haci den Mangel Halto, manera BBQ, ya caba tin reglanan cu Aruba Tourism Authority (ATA) a stipula, pero Fundacion Parke nacional Aruba (FPNA) tin su mesun reglanan tambe y pa tene actividadnan asina e interesadonan mester pidi un permiso. Asina Tyson Lopez, manager di recreacion sostenible, a indica. Di e manera aki FPNA ta yuda maneha e impacto ta pasando, na unda y na ki ora.
Lopez a splica cu esaki ta un maneho cu nan tin actualmente den Parke Arikok, pero tambe nan ta implementando esaki pa resto di e areanan.
E area di Mangel Halto tin un balor hopi halto tanto social, como cultural, economico y pa naturaleza. Ya caba tin educacion ta tumando lugar eynan, manera tayernan di trabao cu mucha, tin ora cu scolnan ta bin pa wordo siña, y asina aki lo bay tin mas presencia di e personal di FPNA, eynan.
Cu otro palabra, ora e canal pa awa drenta den e mangrove, ora tin palapa nobo ubica y gazebonan den e parti di beach di Mangel Halto, lo bin cu borchi di informacion pa e comunidad compronde e importancia di e area aki ora di haci uso di dje. E no ta solamente pa Mangel Halto pero tambe pa Santo Largo y na unda personanan ta recrea, pa nan sa e impacto cu por afecta naturaleza y cu mester minimiza esaki. Pues, e proyecto cu nan lo cuminza despues cu ATA pa précis pa concientiza e comunidad local pero tambe bishitantenan di afo, con ora di bay den naturaleza nan mester dirigi na mes.
Pa ultimo, Tyson Lopez a menciona cu tin bari di sushi den su dos punto pero e pensamento ta cu e hendenan mes mester bay cu e sushi cu nan produci. Asina ta evita cu cacho basha e barinan abao y plama e sushi of biento mes plam'e.
