Proyecto pa horticultura local ta bira realidad cu Agri-Innovation Park

Aruba ta inicia e proceso pa un futuro sostenibel:

*Tin mas di 110 horticultor, agricultor y persona interesa 

ORANJESTAD (AAN):  Diamars anochi Minister di Finansa, Asunto Economico y Sector Primario, Geoffrey Wever a presenta e proyecto Agri-Innovation Park na mas di 110 horticultor, agricultor y personanan interesa pa bira esaki.

            Den un momento cu por ser describi como historico pa e sector di agricultura di Aruba, Minister Wever, a presenta e proyecto Agri-Innovation Park cu ta bay transforma e manera cu nos isla ta produci y consumi fruta y berdura.

            Ministerio di Sector Primario ta trahando hunto cu Santa Rosa riba un plan integral pa henter e sector primario, pero e proyecto aki ta enfoca riba produccion di alimento den kas, brinda un infrastructura unda cu tur agricultor por haya informacion y por educa nan mes riba e area di agricultura comercial.

            Durante e sesion a ricibi varios sugerencia di e participantenan, cual nos lo tene cuenta cune den e proceso di desaroyo di e AIP. E proyecto ta un paso firme den direccion di autosuficiencia alimentario, sostenibilidad y crecemento economico local.

            "E futuro alimenticio di nos pueblo no mester depende di importacion," Minister Wever a enfatisa. "Nos tin tera, nos tin solo, nos tin hende balente y awor nos tin e vision y e plan pa crea un sistema di produccion local cu ta resisti crisis, crea trabou y yuda nos pueblo come mas saludabel." 

Un fundeshi pa progreso: E rol di e Agri-Innovation Park

            Diferente estudio a ser haci durante e ultimo añanan pa sondea cua ta e mihor forma pa structura e iniciativa aki. Recientemente e rapport di Priva a keda cla for di cual nos a ricibi informacion valioso pa por delinea e direccion cu nos tin cu bay. 

            Banda di haci estudionan, nos a busca expertonan manera Sr. Elwin Groenevelt  pa yuda nos cu guia y sosten profesional den e proceso pa ehecuta e proyecto di vital importancia pa Aruba. E Agri-Innovation Park lo sirbi como e curason di un revolucion horticultural . Situa den un area strategico, na Santa Rosa, e park lo combina cas moderno pa produccion y experimento, espacionan pa educacion, un laboratorio pa innovacion, y facilidadnan pa distribucion y almacenamento.

            E compleho ta parti di e Agripreneurial Development Program (ADP) y ta forma un pilar fundamental di e Plan Nacional 2023–2025 pa un modelo economico mas inclusivo y duradero.

            E obhetivonan principal di AIP ta, desaroya e sector di “horticultura”  pa medio di tecnologia y conocemento, aumenta e capacidad di produccion local reduci dependencia di importacion y diversifica nos economia. 

Impacto real: Menos importacion, mas prosperidad local

            Aruba ta importa mas cu 99 di su fruta y berdura. E estudionan a mustra cu si e proyecto aki ser ehecuta corectamente, por substitui e importacion pa produccion local  di fruta y berdura balora na 111.8 miyon florin.  E vision ta bay mas lew, den un calculacion  pa expansion gradual, e mercado potencial por yega hasta Afl. 300 miyon, incluyendo exportacion pa paisnan den region.

            Ademas, e plan por crea 170 cupo di trabou directamente den e sector di kasteelt y 250 cupo di trabou indirectamente den logistica, mantencion, distribucion y servicionan tecnico. Esaki ta loke Minister Wever a describi como “un industria completamente nobo cu por bira un pilar economico pa Aruba.” 

Tres fase di transformacion

            Minister Wever den su presentacion a delinea un ruta pa e desaroyo di e proyecto. Fase 1 (0-3 aña): Fortifica e produccion actual cu “folietunnels” pa lechuga y concomber . Fase 2 (3-5 aña): Introduccion di cas mas avansa, cu teelt di paprika, tomati y leafy greens. Fase 3 (5-8 aña): Escala grandi, 100% autosuficiencia pa berdura y fruta selecciona, preparacion pa exportacion. 

Apoyo, Regulacion y Financiamento

            Minister Wever ta haci un yamada riba nos sector priva y publico pa traha hunto pa por logra. E plan ta inclui recomendacion pa:

-           Tarifanan reduci pa electricidad pa agricultornan nobo;

-           Subsidio pa cubri gastonan inicial y pa expansion y usando tecnologia duradero;

-           Facilidadnan pa credito y fondonan di garantia pa agricultornan cu no por uza cas of tereno como colateral;

-           Zonificacion pa agricultura y proceso acelera pa permiso pa ricibi tereno. 

Un yamada pa accion

            “Nos pueblo kier cuminda na prijs mas abou, mas fresco y mas saludabel,” Minister Wever a bisa. “Nos sector di agricultura tin e pasion. Gobierno tin e plan. Awor nos mester uni forsa. Solamente si nos traha hunto, e transformacion ta posibel.”

            E minister ta yama tur agricultor cu ta interesa den horticultura pa tuma parti den e proyecto aki. E oportunidad ta real, e plan ta sigur, y e beneficio pa Aruba ta hopi.