Den tratamento di caso cu porta sera
ORANJESTAD (AAN): Diahuebs mainta den “Raadkamer”, tratamento di caso cu Mike de Meza a cuminsa contra Ministerio Publco, a tuma lugar. “Raadkamer” ta tratamento di un caso cu porta sera o sea ningun prensa y publico por ta presente. Den sala di Corte tabata presente: Hues, abogado mr. D. Croes, hurista Duijneveld, Mike de Meza y Fiscal di Ministerio Publico.
KICO TA SOSPECHA DE MEZA DI DJE?
Informacion cu ta dispone di dje, ta mustra cu tratamento di e caso no a dura mucho. Mr. D.Croes, asisti pa Duijneveld, a bisa Hues cu de Meza tin derecho di haya sa, awor cu Ministerio Publico ta consider’e como sospechoso, kico e ta wordo sospecha di dje. Mr. Croes a bisa Hues cu loke de Meza kier, ta pa Hues ordena Ministerio Publico pa informa de Meza, kico e ta wordo sospecha di dje.
NO POR SIGUI LAGA DE MEZA DEN DUDA
Mr. Croes a remarca cu Ministerio Publico ta bisa cu segun EVRM (Derechonan Humano) y Constitucion, de Meza lo wordo poni na altura di loke e ta wordo sospecha di dje, na momento di su detencion of si eventual e wordo sera. E abogado a bisa Hues cu nan no ta comparti e punto di bista aki. El a cuestiona e ponencia di Fiscal cu por cualifica un persona como sospechoso y despues, den silencio hala e sospecho aden. Mr. Croes ta haya esaki inhusto, pasobra ta laga de Meza pa hopi tempo den duda. Na opinion di mr. Croes, no por laga de Meza den duda asina tanto, teniendo na cuenta e circumstancianan y interesnan cu tin.
E abogado a mustra cu un bon proceso di husticia ta exigi cu de Meza ta wordo poni na altura di kico e ta wordo sospecha di dje. E abogado a bisa cu esaki ta wordo garantiza den EVRM (Derechonan Humano).
E abogado ta cuestiona tambe e ponencia di Fiscal cu mester rechaza e exigencia di mr. Croes pasobra te ainda Ministerio Publico no a tuma un decision si ta bay persigui de Meza of no. E abogado a mustra cu Fiscal no por bay core sconde tras di e obligacion di secreto di e LIM. Mr. Croes ta haya cu e actitud aki di Fiscal, ta perhudica directamente e candidatura pa minister y ta tacha e honor y bon nomber di de Meza.
NO TA E LUGAR PA ATENDE ASUNTO DI BELASTING
Mr. Croes a señala henter e asunto di denuncia cu Departamento di Impuesto (DIMP) a haci na Ministerio Publico contra de Meza. Un carta a bay na Formador, kende a informa de Meza di esaki. Na opinion di mr. Croes, esaki ta wordo considera un notificacion oficial.
E abogado ta haya cu ta FIOT ta e instancia cu mester haci investigacion relaciona cu incumplimento di belasting y no Ministerio Publico. E abogado a bisa cu ta hopi straño cu FIOT no a haci investigacion. E abogado ta haya cu Ministerio Publico ta haci mal uso di su poder.
Hues a bisa cu den careda di otro siman, e lo tuma un decision.
