Proyecto na Aeropuerto tin di tene cuenta cu fluho di pasahero pa siguiente lunanan

Trabao no por stroba viaheronan - ORANJESTAD (AAN): Diaranson atardi den VIP Room di Aeropuerto di Aruba, Ministro Dangui Oduber a duna informacion di e site-visit cu el a haci unda e proyecto di renobacion y expansion conoci como ‘Gateway 2030’ ta den full swing.

   Minister Oduber a duna di conoce tambe cu inicialmente e proyecto di Gateway 2030 tabata tin un inversion di 250 miyon Dollar. Esaki naturalmente tabata prome cu e pandemia.

   Pero na Maart 2020, e pandemia a cambia henter a panorama di e proyecto.  E proyecto di 1 solo fase, a wordo dividi den mas fase.

   Resultado di esey ta cu awor e tin un inversion di 140 miyon Dollar.

   E titular di Turismo a agrega, cu nan a haya nan ta re-programa henter e proyecto y asina pone e proyecto den diferente fase. Esaki no ta un proyecto facil, e tin hopi parti complica cune, como cu e ta na un aeropuerto cu mester keda den operacional na tur momento, principalmente e fluho di pasahero cu Aruba cu nan ta calculando cu Aeropuerto lo bay haya den lunanan venidero y tambe na 2022.  Esey ta un reto grandi pa Aruba su Aeropuerto, pasobra mey-mey di construccion aki, nan lo tin di bay trata na keda mantene e nivel y grado di servicio na e pasaheronan.

   E recuperacion despues di reapertura di turismo, ta bayendo basta bon y Aeropuerto di Aruba mes ta mira cu e cifranan ta sobrepasando nan expectativanan.

   Despues cu Fase 1A wordo entrega mey-mey di aña 2024, lo tin di dicidi kico lo bira e siguiente paso.

   Ministro a subraya aki cu e proyecto ta canando keto bay su bon caminda, pues e ta “on-schedule”.

   Minister Dangui Oduber den nomber di Gobierno di Aruba a manda palabranan di gradicimento na tur stakeholder’s pa nan trabao, compromiso y cooperacion pa cu e proyecto.

   Na final e mandatario a manda un danki special na tur e contratistanan y tambe na cada un di e trahadornan cu ta haci proyecto Gateway 2030 posibel. Aruba ta progresando y manera nos a bisa den campaña, e pais lo prospera back.