Monumentenfonds celebrando final di parti exterior di restauracion di ex-Botica Aruba

ORANJESTAD (AAN) – E director di Stichting Monumentenfonds Aruba (SMFA), señora Anne Wilsenburg, a yama un conferencia di prensa, Diaranzon mainta,

den cual a elabora riba e proyecto di restauracion di e casco, di e monumento ubica na Steenweg 19, conoci como ex-“Botica Aruba” of ex-”El Mercado”, cual a keda finaliza.

   Tabata presente tambe Minister di Cultura, e ex-doñonan di e propiedad menciona, y tur esnan cu tin di haber cu e proyecto, directiva y team di SMFA, na kendenan señora Wilsenburg a yama un cordial bon bini.

“Awe nos ta celebra e finalizacion di e restauracion di e edificio aki. Nos no ta cla ainda, y manera por a wak e parti pafo a keda bunita pero e parti paden ta falta hopi trabao”, Witsenburg a expresa, y seguidamente a gradici di curazon na su team, e arkitectonan, contratista y tur cu tabata tin e proyecto aki na nan encargo: “Pasobra, un proyecto asina no ta mi persona como directora ta haci, pero e ta rekeri di un team, y nos tabata tin un bon team riba e proyecto aki”, el a comenta.

   Anne Wilsenburg a menciona cu e edificio aki tin 94 aña di existencia, pues aki cuater aña lo por celebra su prome siglo.  El a indica cu e prome diez añanan e edificio tabata un bon cas, construi pa famia Croes y tabata tin hende cu a biba den e cas aki.

   Despues di e diez añanan aki meneer Adison Croes cu Gustave Nouel a tuma e decision pa cuminza cu Botica Aruba, anto e parti abao a bira e botica y e famia tabata biba den e parti pariba.

“Mi a tende un storia cu e meneer cu tabata biba ariba tabata gusta toca piano y tur hende cu a bin na e botica tabata scucha musica. Por ta nos por haya algo di e ambiente bek, akinan”, Wilsenburg a expresa.

El a sigui conta cu na aña 1992 e negoshi “El Mercado” a cuminza den dicho edificio, y despues el a keda bashi y cera pa hopi aña. “E cas a bay riba vindishi, y nos di Monumentenfonds a wak e prijs baha, baha, y baha mas te e momento cu nos a tuma decision cu si ningun hende kier cumpre, ni haci un esfuerzo pa restauracion, nos a bay cerca notario y riba vindishi nos a cumpra e cas aki”, e dama a relata.

El a splica cu, eigenlijk, esaki ta un riesgo cu normalmente e Stichting no ta tuma; nan ta cumpra un monumento solamente si nan sa kico nan ta bay haci cune, y si nos sa cu tin un huurdo cu por paga e huur, cu locual nos por paga hipoteca y mantenimento, etc. “E riesgo si nos a tuma, y nos ta contento cu nos a tume. A tuma hopi tempo si, pero nos kier sa cu ni un huurdo tabata interesa na momento cu e cas tabata na werki. Pesey nos a dicidi pa cuminza cu un modelo basico un tiki nobo, un tiki otro pa nos; y nos a cuminza cu un proyecto cu yama ‘casco restauratie’, kiermen un restauracion di e parti pafo so”, señora Witsenburg a splica.

El a menciona tambe cu nan a haci hopi research con e edificio tabata antes, e balcon na banda, etc., y danki na e famia cu a comparti potretnan di antes, cu nos por a reconstrui précis con e tabata ta originalmente.

   Diaranzon SMFA a celebra cu a keda cla cu e parti pafo, y nan ta wardando pa loke ta e parti paden.