ORANJESTAD (AAN): Durante conferencia di prensa di gobierno dialuna mainta, Premier Wever - Croes a referi na e proyecto 'Memorial Seroe Colorado'.
El a indica cu Aruba a forma un parti importante durante e Segunda Guera Mundial. Durante e periodo aki, Aruba su refineria tabata abastece e avionnan di e aliadonan. Na cierto momento, e alemannan a logra isola e forsanan aliado di por haya abastecimento di e fuel cu nan mester y ta na Aruba y Corsou so nan por a hay'e.
Den esaki e alemannan a lansa un atake masivo ariba Aruba cu submarinonan pa asina destrui e refineria y den e proceso aki a rementa varios barco y como 47 persona a fayece di cual gran mayoria tabata mericano y entre nan 16 persona di Boneiro, Wever - Croes a expresa.
Pa cu esaki gobierno kier construi un 'memorial monument' na e punta di Seroe na Seroe Colorado cu dos proposito. "Pa nos tur corda nos pasado y pa siña di dje pa asina evita cu cosnan cu a pasa den pasado bolbe ripiti, pero tambe pa nos recorda nos bishitantenan e papel importante cu Aruba a hunga e tempo eynan", e mandatario a duna di conoce.
Gobierno ta kere cu esaki lo bira un atraccion turistico hopi grandi. E renovacion di e producto turistico tambe ta hopi importante y atraccionnan 'outdoor' ta hopi gusta, a bisa.
Asina a bin cu e comision 'Aruba outdoor amenities' cu a traha caba riba Ayo y ta trahando riba Casibari y a ta trahando awo riba e proyecto aki di Seroe Colorado caminda e 'lighthouse' ta ubica, a agrega.
Rond di e area ey ta mira cu tabata tin cuater bateria y rond di nan tabata tin bunkernan caminda cy tur cos tabata tuma lugar pa proteha Aruba su refineria. "Un balor historico enormemente grandi cu no ta bon conserva", a señala.
Kier bay cambia esaki cu un impacto minimo riba naturalesa manteniendo e balor di medio ambiente y naturalesa como tambe un impacto financiero abao mirando cu no tin e fondonan grandi, Evelyn Wever-Croes a duna di conoce.
Locual ta bay haci eynan ta un 'looppad', caminda e hendenan por cana y mira e baterianan aki y tambe meymey lo bin un monumento caminda lo bin e nomber di esnan cu a fayece, SETAR lo pone un QR Code pa tin e posibilidad di 'download' via e telefon e 'timeline', un realidad virtual di kico a pasa ora cu e submarino tabata yegando cerca te na e momento cu el a bombardea e barconan.
Esaki ta bay bira un centro di atraccion eynan. Ya caba tin contacto cu tur e operadonan turistico cu ta hopi entusiasma pa ofrece esaki adicional na e turistanan. Unabes cu a turista caba di bishita e sitio eynan, e operadonan turistico lo hiba turistanan den centro di San Nicolas y lo coordina kico cual otro actividadnan por haci of cua sitionan por bishita, e mandatario a indica.
E fondonan y e proyecto aki a wordo aproba caba. E fondonan ta bin di TPF y di e ministerionan y e lo bay den e presupuesto di otro aña.
Kier logra finalisa henter e proyecto aki otro aña pa luna di Mei ora cu ta conmemora Segunda Guera Mundial, Prome Minister a finalisa bisando.
