A bira tempo pa haci un estudio cientifico riba e topico
- Trafico ta bira pio cu peligernan di desastre natural
- Con gasto causa pa accidente a baha durante lockdown?
ORANJESTAD(AAN)— Kico ta pasa cu un persona ora e sinta den su vehiculo y asumi su responsabilidad como chofer?
Un pregunta serio cu mester wordo somete na investigacion pasobra tin algo completamente robez cu e actitud di hende enfrente e responsabilidad cu e ta asumi ora e actua como chofer.
Na momento cu un persona maneha un vehiculo, e ta asumi responsabilidad personal pa su bida y pa tur otro persona cu por cruza su vehiculo na cualkier forma y pa propiedad di otro persona.
Pa un persona por participa na trafico tin regla. E prome regla ta, cu e conoce e reglanan loke ta nifica cu trafico no ta un circo, pero un asunto sumamente serio.
Pa un persona haci uso di caya sin mas, e no mester di papel a menos cu tin impedimento pa e ta den publico y esaki no ta nifica solamente caya.
Pa un persona persona maneho un vehiculo, e mester di un permiso, di un prueba cu e ta capaz pa haci uso di un vehiculo y participa na trafico.
Kico e palabra trafico ta nifica? Kico e ta encera?
Trafico ta mustra riba e participacion di un cantidad di persona of obheto den un situacion den cual tin movecion.
Den loke nos ta yama trafico diariamente, hende y vehiculo ta move segun regla, cu ta evita cu a base di e peligernan presente, hende causa daño na otro.
Trafico ta mas exigente cu cualkier trabou pasobra e ta exigi pa e persona cu ta na mando den un vehiculo of e persona cu ta cana riba caminda publico, continuamente ta sigui regla pa asina evita desgracia.
Nos ta papia hopi di vehiculo. Pero kico ta pasa cu e personanan cu mester cruza caya y ta dicidi di cruza caretera na momento cu un vehiculo ta acerca?
E peaton den trafico tambe mester atene su mes na regla. E mester evita cu e ta ocasiona un accidente den cual otro ta bira victima.
Cuanto biaha un persona cu ta maneha of ta sinta den un vehiculo ta bira victima di un persona cu a dicidi pa pasa dilanti di e vehiculo cu mester brake diripiente of desvia?
Responsabilidad ta e palabra mayor den accidente cu no solamente ta causa tristeza y dolor, pero tambe ta encera gastonan enorme cu mester cubri pa e daño material pero tambe lesionnan cu ta resultado.
Bida di famianan ta wordo cambia y DIARIO tabata pionero den lansamento di e posibilidad pa e persona cu ocasiona un accidente paga pa e resultado cu morto of invalidez di un victima por tin pa e familia tambe.
E temporada cu Covid-19 a deshaci di trafico mester sirbi como estudio pa determina cuanto placa comunidad ta paga pa motibo di accidentenan den trafico.
Aruba ta ubica den un zona trankil generalmente pa desastre natural. Trafico ta bira e destructor di bienestar di hende y di propiedad di hende, hasta ora nan ta den nan cas, den nan cura, den nan circulo familiar.
E pregunta ta keda pues, pakico? Kico ta e “kick”pa hunga moderno nos tambe, cu un hende ta sinti ora e abusa di regla di trafico?
E ta sinto su mes poderoso? E ta sinti su mes na mando di kico? Kico ta pasa den cabez di un persona, cu ta core cu un velocidad halto, ta kibra tur regla di trafico?
Loke e ta haci tur hende por, si tur hende ta dispuesto di bira mes abusador cu e ta pero tambe mes bobo cu e ta.
Kico Polis mester haci? Mester pone un agente policial tras di cada vehiculo? Mester pone un agente policial cana tras di cada persona cu ta haci uzo di espacio publico?
Aparentemente castigo no ta yuda. Tin algo superior cu ta causa e comportacion actual den trafico.
Cifranan importante mester subi mesa y wordo presenta na publico. Mester pone mas enfasis riba e posibilidad sigur na un isla chikito pa transportacion publico cu ta e alternativa pa un auto pa cada habitante pasobra ya no por papia di un auto pa cada famia.
E palabra final, sinembargo, no ta den man ni di Polis ni di Gobierno pero den man di e persona, cu (pa un motibo of otro pero sigur pa bobedad) ta kere cu e por kibra tur regla den trafico, cu asina ta bira trampa mortal.
