Proyecto Herencia Cultural Subaquatico lo prepara profesionalnan miho pa haci investigacion bao awa

Pancho Geerman, Director Interino di MANA:

ORANJESTAD (AAN): Actualmente y te cu dia 10 di november, Aruba ta sede di un training importante relaciona cu e proyecto Herencia Cultural Subaquatico. Den un entrevista cu DIARIO, señor Pancho Geerman, Director Interino di Museo Arqueologico Nacional Aruba (MANA), a destaca cu te awo no a duna suficiente atencion na nos herencia cultural bou di awa, y cu tin un gran falta di investigacioon den e area ey.

   Segun señor Geerman, ora ta papia di arqueologia maritimo, esaki ta abarca tur cos cu tin di haber cu awa—lama, pos, waf, y otro cu ta relacional cu e medio acuatico.

   El a indica cu pa haci investigacion den e area aki, e investigador mester tin e conocimiento necesario di con ta investiga bou di awa. Un di e rekisito principal ta cu e persona mester sa sambuya, cu tecnicanan special pa midi y pinta bou di awa. Otro rekisito importante ta un entrenamiento specialisa pa por haci investigacion relaciona cu awa—manera ta tumando luga durante e dianan aki te cu 10 di November.

   E proyecto aki ta un esfuerso continuo. Y door di e ratificacion di Unesco, mester atende cu e reglanan internacional y colabora cu otro. E intencion ta pa traha hunto cu tur 6 isla den Reino, pa comparti conocimiento y duna sosten pa esnan cu no tin suficiente profesionalnan disponibel, por pidi asistensia di e otro paisnan.

   E proyecto ta inclui colaboracion cu instancianan cu ta responsabel pa conservacion y proteccion di naturalesa y herencia cultural, y tambe cu scolnan di sambuyamento. “Basicamente, cuido di naturalesa y di nos herencia cultural ta un responsabilidad di cada ciudadano,” señor Geerman a splica.

  El a agrega cu na final di e proyecto, e participantenan lo presenta un plan concreto pa maneha un sitio scogi, den e caso aki: Pedernales, un barco di guera gesink durante Segunda Guera Mundial, popular pa buceo y ideal pa investigacion maritimo na Aruba.