Minister Mervin Wyatt-Ras:
ORANJESTAD (AAN): Minister di Salubridad, Asuntonan Social, Cuido di Adulto Mayor y Maneho di Adiccion, señora Mervin Wyatt-Ras, a duna mas claridad den un entrevista reciente cu DIARIO tocante e situacion preocupante di algun ciudadano cu ta biba riba caya.
Durante e ultimo añanan, e situacion aki a bira mas visibel y persistente. Segun e minister, varios di e persona aki ta enfrenta desafionan serio manera adiccion, problema di salud mental, of simplemente a perde nan cas pa motibonan economico y personal.
Minister Wyatt-Ras a indica cu tradicionalmente, na Aruba ciudadanonan, famia y bisiña tabata habri nan porta pa yuda esnan cu tabata sin hogar, pero esey a cambia. Awendia, mas hende ta keda sin ningun tipo di apoyo y, como consecuencia, ta keda biba riba caya.
Aki no ta trata solamente di un cuestion social, pero tambe di un problema di vivienda. E lista di espera pa haya un cas social via FCCA ta sigui crece, mientrastanto nos poblacion tambe a aumenta, y esaki ta pone presion adicional riba e mercado di vivienda.
E minister a agrega cu apesar cu turismo ta sigui crece, Aruba ta ricibi, nan tambe, y hopi migrante nobo, tambe ta busca un luga pa biba y ta contribui na e escases di vivienda y ta pone mas hende den situacion dificil.
Organisacionanan manera Asuntonan Social, FCCA, Respaldo y otro cu ta trata cu adiccion y bienestar mental, ta sigui wordo acerca pa duna asistencia. Gobierno di Aruba ta atendiendo e situacion aki y ta trahando riba solucionnan pa e escases di vivienda.
“Tin biaha bo tin cu wak e con conflictivo e problema ta pa asina por atende cu ne. Nos ta habri pa cu esaki y ta spera cu e personanan aki por haya yudansa”, Minister Wyatt-Ras a duna di conoce.
