Proyecto di SETAR 'End of Year Clean-Up' a haya tremendo acogida

ORANJESTAD (AAN): Den un forma di yuda y duna bek na comunidad, SETAR a organisa e “End Of Year Clean-Up” durante e weekend cu a pasa.

            A pone varios container na diferente localidad rond di Aruba, p’asina duna e oportunidad na comunidad pa haci nan cura y bario limpi. Cu e proyecto aki, SETAR kier a conscientisa tambe tur cuidadano pa mira e importancia di mantene nan cura limpi y pa no laga sushi acumula.

            Ya den oranan trempan di diasabra por a mira un presencia grandi di pick-up y autonan yena cu sushi, unda hendenan den tur bario a probecha pa limpia nan cas y nan cura.

            SETAR ta considera e weekend aki uno exitoso, mirando e comentarionan positivo cu a ricibi pa e iniciativa aki. E necesidad di pone containernan den barionan pa tira sushi ta algo existente y nos ta contento cu e iniciativa aki a contribui na yuda tene Aruba mas limpi.