Asociacion Amigos de Colombia a celebra 'anochi di bela' diamars

Pa inicia nan festehonan di navidad:

ORANJESTAD (AAN) – Moises Fernandez, presidente di Asociacion Amigos de Colombia, den un entrevista cu DIARIO a elabora tocante "la noche de las velitas" cu nan a celebra Diamars anochi, den nan Plaza di gradicimento.

Fernandez a splica cu nan a celebra Dia di Birgen Sagrada Concepcion, y nan ta yame e anochi di e belitanan. Nan a haci un oracion hunto cu Pastor y cu e evento aki e comunidad Colombiano na Aruba, a duna inicio na nan actividadnan di Navidad (Pasco di Nacemento), manera ta e tradicion den nan pais.

Desde 16 di December ta bay tin e Novena di Fin di Aña, cu ta clausura dia 24 di December cu aguinaldo y evento na e muchanan. Dia 24, lo entrega regalonan na e muchanan cu a atende e novena. E plaza lo keda ilumina tur dia te 24 di December unda e famianan por bin pasa un rato agradable cu nan yiunan.