Proyecto di rotonde nobo na final di Caya Grandi awor a pasa pa 2024

Dilanti ex-Refresqueria La Fama

ORANJESTAD (AAN): Algun tempo pasa ora cu DOW a construi e rotonde chikito na e cruzada di Wilhelminastraat cu Adriaan Lacle Boulevard, net pabao di NV Elmar na Playa, nan a duna indicacion cu durante 2023 nan siguiente trabao di construi rotonde lo ta e cruzada cu tin dilanti ex-Refresqueria La Fama, hunto cu Peanuts Restaurant y Citgo Caya Grandi.

   ing. Marlon Croes di DOW a confirma cu diferente factor a hunga un rol, pa cual nan no por a sigui cu e schedule original di construi e rotonde ey den e aña cu ta finalisando aki.

   Esey a pone cu DOW no tabatin fondo disponible pa haci e rotonde bira realidad, y pa tal motibo a pospone e proyecto y awor a pone riba agenda pa wordo completa na 2024.

   Ademas di e rotonde dilanti Refresqueria La Fama, lo bay construi un rotonde chikito tambe na e cruzada di Van Leeuwenhoekstraat y Caya ing. Roland Lacle, pues net banda di e estatua di Plaza Juan Pablo Duarte.

   E bon noticia ta cu e construccion lo no socede ni durante temporada di Carnaval y tampoco ora cu tin scol.  Segun ing. Croes, e trabaonan aki lo socede durante vacacion escolar, pues lo tin menos trafico den dia eyriba.

    Esnan cu tin suficiente edad, por corda cu e caminda aki dilanti La Fama tabatin un rotonde grandi prome cu esaki a wordo elimina na comienso di decada di 1980.  E biaha aki e lo no bay ta uno mes grandi cu esun di pasado.