Proyecto di prevencion abuso di mucha lo wordo introduci na tur scol na Aruba

ORANJESTAD (AAN): Diasabra atardi a lansa e campaña di prevencion contra abuso di mucha ‘Mi mes un heroe’. 

Entre e invitadonan por a conta cu presencia di Gobernador  Alfonso Boekhoudt, Presidente di Parlamento Edgard Vrolijk, Prome Minister Evelyn Wever-Croes, Minister Rocco Tjon, Parlamentarionan di Coalicion y demas invitadonan special.

   Durante e ocasion special aki Minister Endy Croes a hiba palabra unda e expresa cu na momento cu Minister Tjon a acerca cu e proyecto aki y despues di a ricibi e presentacion di Edselyn Figaroa y Liza Helder mas cu claro e proyecto aki ta fit completamente den e vison di Gabinete Wever-Croes 2. Unda e tema di abuso di mucha tin un prioridad hopi halto y na mes momento a acerca Prome Minister di Aruba señora Evelyn Wever-Croes pa forma e ekipo.

   Minister Endy Croes a sigui bisa cu den colaboracion pa busca e fondonan necesario pa pone accion tras di nos palabra y promesa. Gobierno ta kere hopi den e proyecto aki. Hopi a worde haci pero e parti preventivo y duna e muchanan e herment necesario tabata falta. Despues di hopi aña di preparacion di Edselyn nos a logra cu awe nos ta lansa e bunita proyecto aki.

   E mandatario a sigui bisa na diferente ocasion y den diferente discurso e ta papia di e competencianan di siglo 21 y ta menciona hopi biaha e cuater letter C.  Minister Endy Croes a elabora riba e tres letter C nan aki a forma e parti esencial pa por a logra e proyecto aki.

   E prome ta e comunicacion entre e Ministerionan. E di dos tabata e creatividad di ful e ekipo, tanto den e ekipo di Edselyn y Ministerio di Husticia y Asuntonan Social y tur esnan cu a carga e proyecto aki. Pero sigur importante ta e C di colaboracion saliendo for di e pandemia mester tine e creatividad y e colaboracion entre Ministerio cu ta sostene e proyecto aki.

   Esey ta duna nos e trankilidad y felicidad pa traha den un ekipo, primordialmente pa e muchanan, nan merece di ta feliz, nan merece di worde protegi, nan merece di cariño y amor. Tipo di proyectonan aki nos ta creando e brug pa logra tur e aspecto nan aki den e parti preventivo brindandonan e herment nan necesario. Como Minister di Enseñansa y Deporte ta mi tarea sigur pa introduci esaki tambe den tur  scol na Aruba y na e miho contribucion posibel pa por logra e efectividad necesario pa proteha nos muchanan y pa nan por ta feliz.