ORANJESTAD (AAN): Proyecto Hunto Grandi Grandi Hunto durante februari y maart a ofrece un serie di 7 workshop cu e tema Vulnerabilidad di un Adulto Mayor cu a termina Diahuebs ultimo.
Señora Rosa Leon, "Gerontoloog", coordinador di e Proyecto HGGH (bou auspicio di Fundacion Movemento ta Bida) conhuntamente cu Señora Madelyne Ridderstap, "Begeleidingskundige" na Departamento di Asunto Social tabata e facilitadornan durante e workshop. A enfoca riba topiconan primordial y tambe topiconan secundario, pero sigur no di menos importancia.
Diferente representantenan di esnan cu ta traha cu Adultonan Mayor tabata presente na e workshop aki, p.e. Casnan di Cuido, FAVI, Dagopvang, yiunan cu tin nan mayornan na nan encargo, representante di Grupo di 60+, trahadornan di un Cas di adulto mayor cu ta "speciaal" y un Welzijnsconsulent.
Por bisa cu tur participante a bay cas cu un maleta yen di informacion, cu sigur lo ta di gran balor pa nan trabao cu nos adultonan mayor. Ariba e ultimo dia tur participante mester a compila un poster caminda ta reproduci tur locual cu a siña durante e 7 simannan cu a pasa.
Esnan cu a participa tabata masha contento cu nan por a refleha conhuntamente riba e trabao cu adultonan mayor, como cu e ocacionnan pa risibi informacion specifico riba e topiconan aki ta masha scars na Aruba.
Danki na Fundacion Movemiento Ta Bida, Cede Aruba, Samenwerkende Fondsen, Departamento di Asuntonan Social y Proyecto Hunto Grandi Grandi Hunto pa haci e workshop posibel. Por ultimo a gradici tur participante individualmente pa nan participacion y a ricibi un certificado di participacion.
