Celebracion Dia di Rey 2023
ORANJESTAD (AAN): Hisamento di fli ta parti di nos cultura y tur aña den luna di april tin actividad y competencia di hisamento di fli den barionan. Riba e peticion di Minister di Cultura, Comision Celebracion Dianan Nacional a acerca Biblioteca Nacional pa por organiza un tayer con pa traha fli pa nos muchanan y hobennan. Tur e fli cu worde traha lo worde poni den sala di exposicion na Biblioteca Nacional situa na George Madurostraat.
E tayer lo tuma luga Diaranson 19 di april na Biblioteca Nacional situa na George Madurostraat for di 3 ’or di atardi pa 5 ’or di atardi. Luga pa participantenan ta limita. Mester yama 528-1500 pa inscribi, muchanan di 5 aña bay ariba por inscribi pa participa.
E tayer interesante aki lo ser presenta pa Sr. Julio Werleman y tur material inclui ta gratis pa e muchanan cu ta desea di participa. Na final di e tayer riba e dianan 21, 24 y 25 april 2023 tur fli lo wordi exponi den sala Diamante pa pueblo por pasa mira e obranan di e muchanan durante orario di Biblioteca Nacional. Despues di e exposion muchanan ta haya e fli pa por hiba cas.
Comision Celebracion Dianan Nacional y Ministerio di Cultura ta kere ta importante pa educa e muchanan riba e cultura di fli y haciendo esaki den cooperacion cu Biblioteca Nacional lo percura pa educa e muchanan con ta traha nan propio fli.
Ademas Comision Celebracion Dianan Nacional ta haci uso di e oportunidad pa tur organizacion riba e isla cu tin un evento relaciona cu dia di Rey 2023 pa manda nos un e-mail cu e informacion pa e por worde publica den e calendario di evento, por manda e informacion riba nos e-mail: This email address is being protected from spambots. You need JavaScript enabled to view it. .
