Hose Figaroa, presidente di FTA:
ORANJESTAD (AAN) – Tips ta algo inherente na e trabao hotelero pa esnan cu ta duna servicio, aunke no den tur funcion. Den entrevista cu e Presidente di FTA, Hose Figaroa, el a menciona por ehemplo e parti di F&B cu ta haya tips, of e bellman. Tin hende ta bisa cu den sector hotelero e trahadornan ta gana hopi placa pasobra nan ta haya tips. Figaroa a comenta cu mester ta hopi cauteloso cu esaki pasobra no ta tur trahado den horeca ta haya tips.
E parti di tips semper ta un tiki dificil pa controla, pasobra di un banda ta wordo bisa cu e trahado no ta paga belasting riba dje, pasobra e no ta aparece ni un caminda. No obstante, Figaroa ta splica cu tips ta algo cu ta fluctua masha hopi mes. Un dia e trahado ta bay cas cu bon placa, tin dia ta bay cas man bashi, y mester tene cuenta cu e ta depende di unda e persona ta traha, cu e tips ta bay baha tambe.
Hopi biaha ta wordo bisa cu mester regula e tips di e trahado, pero por ta e ta traha den un restaurant chikito cu e ta bay cas podise cu 20 dollar pa dia na tips, mientras cu den un restaurant mas grandi e trahado por bay cas cu 150 pa 200 dollar pa dia na tips. El a remarca cu tips ta varia pa temporada, unda tin un par di luna of un par di aña cu e trahado ta gana miho y otronan menos. Pero, esey ta inherente na e tipo di servicio duna, pues FTA no ta kere den regulacion di e sistema aki. Mayoria di banco ta tene na cuenta cu un porcentahe di entrada na tips, pero di otro banda ta un riesgo pa tuma trabaonan asina, pasobra aunke e persona por gana bon cen den su man, e consecuencia ta cu e no por haya fianza, etc., y mester spaar pa cierto cosnan cu e kier haci. Di un banda ta un riesgo pero di otro e ta un tipo di trabao hopi atractivo, segun pa loke ta trata e servicio door di e parti di tips, pero e entrada aki no ta stabil.
