ORANJESTAD (AAN): Siman pasa Diaranson, Ministro Gerlien Croes di Enseñanza, a ricibi presentacion di ‘onderzoeksdocenten’
tocante e proyecto CTR21 representa pa dr. Gregory Richardson y Melendy Neuman.
CTR21 ta trata un proyecto pa maestronan di scol basico pa islanan di Caribe Hulandes. E ta un estudio basa riba practica cu ta trata di identifica formanan efectivo pa stimula un mentalidad basa riba investigacion entre docentenan di scolnan basico den Caribe Hulandes.
Tambe e tin como meta pa crea y comparti practicanan di investigacion inovativo na e scolnan participante cu e meta pa satisface e necesidadnan di alumnonan na e islanan aki.
Via e proyecto aki e maestronan ta desaroya habilidadnan pa haci investigacion den nan mesun scolnan pa asina contribui na desaroyo den scolnan. Na Aruba tin 3 scol cu a participa: Prinses Amalia, Xander Bogaerts y Colegio Santa Famia.
E proyecto mes ta un colaboracion entre Instituto Pedagogico Arubano (IPA), Universidad di Curaçao Dr. Moises da Costa Gomez (UoC), University of St Maarten (USM), Universidad di Aruba (UA), y Nationaal Regieorgaan Onderwijsonderzoek (NRO).
