Parlamentario Otami Thomasia di AVP
ORANJESTAD (AAN): Parlamentario di AVP, Otami Thomasia, hunto cu otro miembronan di Parlamento, recientemente a realisa un bishita di trabao na Fundacion Contra Violencia Relacional (FCVR). Como President di Comision Fiho di Asuntonan Social tabata un bishita particularmente positivo pa Thomasia di haya un organizacion cu a crece y evoluciona hopi mas leu cu su rol original como refugio. Awe, FCVR ta traha segun un maneho holistico y integral, basa riba cinco pilar di trabao, cu meta di atende violencia relacional y domestico di manera humano, sostenibel y cu respet pa dignidad humano.
Durante e bishita, representantenan di e fundacion a accentua cu violencia no ta un evento aisla, sino un problema social compleho cu ta toca bienestar emocional, siguridad, dinamica familiar y e confianza den comunidad. “Esaki ta precisamente pakico e maneho di FCVR ta asina importante. Nan no ta mira solamente e momento di crisis, pero henter e proceso prome, durante y despues,” segun Thomasia.
FCVR no ta ofrece refugio solamente, pero tambe intake y orientacion, sosten psychosocial, prevencion y conscientisacion. E fundacion ta traha estrechamente cu diferente instancia manera servicio social, salud, polis, husticia y organizacionnan di comunidad, cu meta di forma un cadena di proteccion pa victima, sin cu nan keda corta entre institucionnan.
Un punto cu a haya atencion special durante e bishita ta e trabao cu mucha. Mucha cu ta crece den ambiente violento ta hopi biaha normalisa abuso. Pa kibra e ciclo aki, FCVR ta duna terapia profesional pa mucha, pa yuda nan procesa loke nan a biba y pa siña cu violencia no ta normal ni aceptabel. Segun Thomasia, “inverti den bienestar di mucha ta inverti den futuro di Aruba.”
Thomasia a pone enfasis tambe riba e importancia di comunicacion eficaz y continuo entre fundacionnan manera FCVR y gobierno. “Si nos kier logra meta real y duradero den combate di violencia, comunicacion cla, habri y basa riba confianza ta esencial. Gobierno mester tin oido pa realidad riba veld, y organizacionnan mester por comparti nan necesidad, reto y recomendacionnan sin barera,” e parlamentario a bisa. Solamente door di dialogo structural y colaboracion honesto, por traha solucionnan cu ta realista y sostenibel.
E fundacion ta traha tambe intensamente riba conscientisacion y formacion. Door di duna workshop na organizacionan y profesional, FCVR ta yuda hende reconoce señal di abuso y sa con pa actua cu cuido, sin revictimisa e persona afecta.
Durante e bishita, a papia habri riba e tabu cu ainda ta existi rond di violencia domestico y relacional. Silencio y miedo ta laga hopi situacion keda scondi. FCVR ta traha pa kibra e tabu aki y pa manda un mensahe cla: papia y actua ta forma parti di proteccion.
Finalmente, Thomasia a indica e preocupacion riba e situacion financiero di FCVR. Aunke e fundacion ta ricibi subsidio di gobierno, e cantidad no ta mas adecua cu e realidad actual di nan amplio pakete di servicio. “Nos mester evalua di nobo con nos ta sostene organizacionnan cu ta carga un responsabilidad asina grandi den nos comunidad,” Thomasia a bisa.
Violencia domestico y relacional no ta un asunto priva, sino un responsabilidad colectivo. E trabao di Fundacion Contra Violencia Relacional ta mustra cu solamente door di proteccion, prevencion y respet pa dignidad humano, nos por traha hunto na un Aruba mas sigur y mas husto pa tur hende.
