Entrevista cu Chiropractor Renato Van Putten:
ORANJESTAD (AAN)-- Matutino DIARIO a entrevista Chiropractor dr. Renato Van Putten, ken ta e prome profesional cu a introduci Chiropractic aki na Aruba, na aña 1990.
Renato Van Putten a studia na Colegio Arubano, unda el a gradua na aña 1984. Ora el a caba scol, inicialmente, el a bay den exterior pa studia pre-medicina, na Merca.
“Mi a bay universidad Christian Oral Roberts, eynan un di e deportenan cu mi a practica ta Judo, y mi a haya un problema cu lomba.
Mi no tabata conoce e profesion di Chiropractic. Aki na Aruba nos no tabata conoce esey y eynan mi a bin ‘in touch’ cu e profesion aki. Mi a wak con efectivo nan tratamento ta pa lomba, y esey a interesa mi.
Anto, a base di esey, mi a bay studia Chiropractic, na “Logan College of Chiropractic”, Renato a relata.
Ocho aña di estudio a tuma Renato pa termina su carera y gradua den su interesante profesion.
“Den nos tempo nos mester a haci prome un pre-medicina. Nos mester a caba cu esey prome cual ta depende si bo por haci un social degree, cu ta cuater aña. “Y despues bo ta bay e Chiropractic School, cu ta cuater aña mas, pero ta a base di tres trimester. Pues, bo ta bay 12 trimester, mas of menos ocho aña di estudio”, Renato van Putten a duna di conoce. Tocante den ki ramo el a specializa mas, el a comenta:
“Na cuminzamento di mi carera mi a haci hopi trabao cu deportistanan, mi a biaha hopi cu teamnan nacional, e temponan ay cu Comite Olimpico, Weganan Centroamericano, cu Baseball, Marlboro, y nos a biaha cu diferente team. Pero mientras edad ta bay pasando bo ta cambia di interes; pasobra ta bin otro specialistanan cu ta mas jong cu bo, mas update cu sport, y mi a bay mirando na e edad cu mi mes tin, ki problemanan nan tin, kico mi por ofrece na nos poblacion di mas edad. Ora mi a bay na edad, ki problemanan nan tin, y mi a atende cu ehercicionan pa hende di mi edad”, Renato a señala.
El a agrega cu problema di desgaste di e lomba abao ta esun primordial den hende grandi, y ta dominante ya cu nos tur cu tempo ta bay haya esey door di nos estilo di bida. “Nos ta sinta hopi, nos trabao ta exigi hopi patras di computer, cu añanan nos ta haya e problemanan ey. Na di dos, problemanan di neck y baho di e brazanan, pasobra un di e motibonan ta cu nos trabao ultimo 30 aña a bira hopi sedentario, sinta, bo ta bay computer, mientras antes bo ta haya hopi hende ta traha afo.
Por ehemplo, ora mi a cuminza traha bo por bisa, 20% tabata hende di oficina, 80% tabata e carpinte, e mecanico, mesla, hendenan cu ta traha den casino, y despues di 30 aña el a cambia: 80% ta hende di oficina, y 20% ta otro”, Renato van Putten a subraya.
Mas di e entrevista aki cu Chiropractor Renato Van Putten, den DIARIO su siguiente edicion.
