Director di ACF Tyson Lopez:
ORANJESTAD (AAN)-- Den entrevista cu Matutino DIARIO, señor Tyson Lopez, Director di Aruba Conservation Foundation, a duna di conoce cu ACF ta trahando riba un proyecto, pa pone borchi paden y pafo di Parke Nacional Arikok.
Esaki ta pa duna indicacion na unda e diferente puntonan di interes ta den Parke Nacional Arikok.
“Dus no ta bay tin borchinan di direccion unda cu ta bisa bo ora bo ta yega na e grootnan, na e bocanan, y esaki ta bay ta pafo di e parke pero tambe paden di e parke. Pues, pa guia e bishitante pa yega Parke Nacional Arikok, tanto via San Fuego como tambe pa Vader Piet”, Lopez a relata.
El a reitera cu esaki ta un proyecto cu ACF ta cuminza aworaki, y pa fin di Mei e mester ta cla pa tin un miho bista con pa bay den parke.
Tin e borchi di regulacionnan caba den Parke, cu ta un proyecto cu a wordo realiza aña pasa. “Tur e puntonan di interes tin nan regla y regulacionnan, y aworaki nos ta haciendo esun di direccion, na unda e hendenan tin cu bay. E ta importante, pasobra enberdad nan mester sa e distancia di unda ta bay, pero asina tambe bo por guia sigur cu tur hende keda riba e camindanan, pa no bay robes of purba explora otro areanan cu locual nan por perde. Nos intencion ta pa tur hende keda riba e caminda indica”, director di ACF a remarca.
El a agrega cu, por ehemplo, inicialmente na Vader Piet den e area di Wadirikiri, a uza baranca p’asina determina na unda e caminda ta.
“Si, nos tin plannan na otro areanan tambe pa haci’e, por ehemplo den area di Dos Playa, pasobra bo ta hayando cu autonan ta bay riba baranca, y pa esnan cu no sa, nos ta den temporada cu parhanan ta brui riba baranca, nos tin e especienan cu ta poniendo webo riba costa y esey bo no ta wak, y facilmente por pasa riba dje. Esey ta e razon tambe cu nos a cer’e pa seguridad, y e tin di haber cu e bida cu ta biba riba e baranca”, Tyson Lopez a detaya.
El a menciona cu esey ta un idea cu ACF tin, pa cera mas area pa ta sigur cu tur hende ta keda riba e caminda indica.
“Tin mas area cu nos ta maneha rond di Aruba, y nos ta cabando di pone tur e borchinan den e areanan nobo, anto nos ta falta esnan di Bubali Plas y Saliña Palm Beach. Aña pasa nos a haci tambe Salinja Malmok. Nos a pone baranca p’asina nos stop auto di pasa, y tin mas caminda cu nos tin cu bay haci e tipo di accionnan asina”, Tyson Lopez, director di ACF a señala.
