Pantaya di Lynx instala pa informa turistanan
ORANJESTAD (AAN): Un recien encuesta di feedback di turismo, conduci pa medio di e plataforma Lynx, a revela cu turistanan cu a uza servicio di taxi na Aruba ta reporta experiencia hopi positivo.
Lynx a colecta mas cu 1.391 contesta boluntario di turistanan pa medio di su plataforma digital cu ta opera riba pantayanan instala den taxi na Aruba. Un analisis di e contestanan ta mustra consistentemente cu bishitantenan ta tene interaccion positivo cu chauffeur di taxi na Aruba.
Entre esnan cu a reacciona, nan ta califica nan experiencia cu taxi, e gran mayoria a duna 5 strea, mientras e otronan cu a contesta, a duna 4 strea.
Ora a puntra e turistanan kico por haci pa mehora nan experiencia cu e servicio di taxi, mayoria ta indica cu nada no tabata mester mehora, mientras hopi di nan comentario describi e chauffeur como amabel, util y hospitalario.
Algun comentario tipico tabata: “Everything was perfect. Smooth ride.” segun e turista C. Green di riba 45 aña di edad procedente di Merca. Otro a contesta: “It was amazing. I loved it. Wish the driver was my personal driver.” Esey tabata di turista J. Cruz di Merca. Otro turista P. Dunight di Merca, di riba di 45 aña di edad a contesta: “It was perfect”. Tambe e turista C. Lambert di Canada a bisa: “Nothing to complain, driver was lovely”.
“Chauffeur di taxi ta hopi biaha un di e prome persona cu turistanan ta conoce ora nan yega Aruba. Nos datonan ta mustra claramente cu bishitantenan ta experiencia nan consistentemente como amabel, profesional y como verdadero embahadornan di nos hospitalidad,” ta loke Brian Ponson a declara. E ta Director di Lynx Advertising, cu ta un division di Nebula Holdings.
E resultadonan di e encuesta ta resalta e importancia cu chauffeur di taxi ta hunga den e forma cu turistanan ta experiencia Aruba y tambe den mantene e reputacion di e isla como un destino hospitable.
DIARIO a compronde cu Lynx tin plan pa sigui colecta feedback di turistanan durante e aña y pa sigui comparti insight cu por yuda mehora e experiencia di bishita, mientras ta resalta e contribucion di diferente sector di servicio den industria di turismo.
Lynx ta un plataforma digital cu ta opera pantayanan informativo den taxi na Aruba. E sistema ta yuda turistanan descubri restaurante, actividadnan y negoshionan local, mientras tambe ta colecta feedback voluntario di bishitantenan tokante nan experiencia riba e isla.
