Proyecto Arubaverse 2.0 ta busca pa start un era nobo di crecemento economico y innovacion

Minister Geoffrey Wever:

ORANJESTAD (AAN):  Den un intento pa revoluciona e panorama economico di San Nicolas, Minister di Asuntunan Economico, Geoffrey Wever, a habri diaranson anochi  den “The Hub” na San Nicolas  e ambicioso proyecto: Arubaverse 2.0. E iniciativa aki ta busca pa start un era nobo di crecemento economico y innovacion, cu un enfasis fuerte riba e probecho di e poder di tecnologia.

            Cu eventonan educativo manera Arubaverse 2.0, kier cuminsa na fomenta un ambiente empresarial innovativo y moderno pa e San Nicolas di futuro. E mandatario a subraya e papel crucial di tecnologia den futuro di comercio. “Avanse tecnologico y procesonan di automaticion ya tin un impacto positivo den comercio, y den departamentonan gubernamental, agilisando procesonan y mehorando eficiensia”, segun minister Wever.

            Pa segura cu empresarionan local ta bon prepara pa e transformacion digital aki, e proyecto Arubaverse 2.0 lo ofrece un serie di tayer mensual y encuentronan den colaboracion cu Fundacion Full Stack Vision. Topiconan cu ta wordo trata ta inclui hermentnan di Inteligensia Artificial (IA) gratis, e ultimo tendencianan digital, principionan di diseño (user design), mercadeo digital, tecnologia di blockchain y mas.

            Arubaverse 2.0 tin como meta inspira empresarionan pa abrasa innovacion, descubri mercadonan nobo, desaroya productonan innovativo, sea mas eficiente y atrae un clientela mas amplio. “Cu un enfoke riba tecnologia y educacion, nos kier empodera empresarionan pa impulsa e ciudad di San Nicolas den un era moderno, crea oportunidad nobo y stimula crecemento economico pa e area”, segun e mandatario.

            Minister Wever a gradici tur persona pa nan entusiasmo, deseando nan hopi exito y inspiracion. Tambe un palabra di gradicimento na Departamento di Asuntonan Economico, directora señora Maria Pita-Dijkhoff y Sharon Meijer, Sr. Bruce Harms di Full Stack Vision Foundation pa e organisacion y ehecucion di e projecto y na Sr. Alexander Lejuez pa un presentacion sumamente interesante!

            DIARIO tambe tabata presente durante e presentacion interesante aki y por bisa cu tabata tin basta interes di personanan di pariba como di pabao di brug.