Protesta dilanti St. Regis Resort pa cobamento den beach y cortamento di mata tipico di Aruba

Nigel Maduro y Marjorie Vermeer a papia

ORANJESTAD (AAN) — Diadomingo tabatin protesta dilanti St. Regis Aruba Resort, unda Nigel Maduro y Marjorie Vermeer a splica prensa kico ta e motibo.

            Nigel Maduro a expresa cu pa hopi aña e ta alerta pueblo tocante kitamento di nos beachnan pa hotelnan, siendo cu esakinan ta tereno publico, pues tereno di e Arubianonan, y un inhusticia ta sosodiendo ora nan ta kitando e hende local su derecho riba e beachnan.

            “Tur esaki ta di nos. Nan no por bin cu nan erpacht burocratico, cu nan ley colonial, nos a siña landa akinan. Bo ta bin pone piedranan y bo aloe akinan, unda nos ta sinta? Bo ta bin coba e parasolnan asina hundo, bisa cu ta propiedad priva, mientras tanto cu e ta riba nos lama?” Maduro a cuestiona. El a mustra con hundo e buraconan cu nan ta cobando ta y ta puntra unda e turtuganan ta bay pone nan neishi. Nan tambe ta perdiendo nan habitat! Nigel a declara cu for di September 2023 el a cuminsa cu e lucha aki, cu graffiti. Despues na augustus 2024 el a bolbe bin haci un par di protesta, pero 15 hende so a yega.    Encuanto Diadomingo ultimo el a vocifera: “Pa e hotel aki nan a cap un mata di kwihi cu ta mas bieu cu mi wela y mi a subi e palo ey pa stop nan di cort’e. Ami so y mi ta bisando cu nan ta bay sigui haci e cosnan aki. Esnan cu supuestamente ta conservando, ta keda keto. Mi a bisa cu mi no ta haci nada mas, e accion aki ta comunidad ta organizando, no ami”, Nigel Maduro a bisa, y a reitera cu esaki ta un inhusticia contra Aruba.

            Seguidamente, Marjorie Vermeer a señala cu ta un ironia di bida cu poco tempo pasa e hunto cu otro personanan mas tabata para den e mesun lugar aki, hunto cu Minister Ursell Arends y nan a firma pa no bin cu mas hotel, pasobra esaki ta beachnan di Aruba. E minister a duna nan razon pero el a baha pero mas beach nan ta keda coi.

            “Cuanto mas nos tin cu keda haci? Bo ta kere cu un turista kier bin akinan cu asina yen di cos? Bo inversion tambe ta bay atras, pasobra no tin mas lugar (beach). E Arubiano cu ta traha den hotel ta sinti’e, bo ta wordo abusa y e no ta bin cu un smile pa e turista tampoco”, Vermeer a subraya.