“Gobierno di Aruba no tin nada di haber cu e acto delincuente aki”
ORANJESTAD (AAN): Den e ultimo dianan aki, por a tuma nota di un scam fraudulento cu ta circula riba varios plataforma di medianan social afirmando cu residentenan di Aruba por ricibi un suma grandi di placa a traves di un programa di inversion cu ta liga na un entidad cu e nomber "PrimeAurora". Esaki ta totalmente falso y autoridadnan di Aruba hunto cu expertonan cibernetico ya ta investigando e acto fraudulento aki.
Ta trata di un scam sofistica crea pa delincuentenan pa gaña y causa daño na uzadonan inocente di medianan social. Cualkier persona cu ta compromete nan mes riba e oferta fraudulento aki, ta na risico di perde nan placa. Prome Minister Evelyn Wever-Croes ta enfatisa cu Gobierno di Aruba no tin nada di haber cu e acto delincuente aki y tampoco esaki no tin ningun sosten legal pa ningun instituto financiero di nos pais.
E mensahe cu ta circula ta sugiri cu si un persona inverti un suma di placa di 200 Florin, e por ricibi pagonan regular y pa bida di devolucionnan di impuesto di un suma di 6.500 Florin. Esaki, Prome Minister a expresa, ta un trampa cu ta propaganda placa facil y ta conoci cu tin usarionan di medianan social ya a cay den dje.
Prome Minister ta urgi cada ciudadano pa keda vigilante y no cay den e trampa di niun oferta financiero sospechoso of di plataformanan online cu ta haci ofertanan y promesa con pa haya placa facil. Conseho ta keda pa cada usuario di medianan social, raporta cualkier oferta dudoso.
E fuente di algun scam ta bin for di e plataforma di noticia local Aruba Today pero e nomber di e website no ta corespondiente na e plataforma di Aruba Today. Esaki ta un detaye cu usuarionan di internet mester tene cuenta cu ne pa saca afo e autenticidad di informacionnan.
Proteha bo mes y bo famia y amistadnan. Ta importante pa sigui desaroyonan financiero via canalnan corecto entre otro, via autoridadnan concerni, via nos plantanan di television local, via radionan local confiabel, via website di Gobierno, via paginanan social di Gobierno, y via corantnan confiabel.
Ora cu ripara un link, y ta duda, no click riba dje; raporta e link na e plataforma relevante; si bo ta duda, puntra un famia of amigo; educa bo amigo y famianan tocante e peligronan di estafa via internet, especialmente; comprende e mensahe, si e oferta ta zona irealistico y no a bin di un fuente confiabel, cu ta haci promesanan pa haya placa facil sin gana of traha p’e, hopi sigur ta pasobra e ta falso.
Aki Prome Minister a declara: “Mi ta pidi tur ciudadano pa ta alerta y no click riba e link di e scam aki ni comparti e link cu otro hende. E link ta diseña pa saca informacion personal, data financiero y otro detayenan sensitivo cu ta pone bo na riesgo. Estafodonan generalmente ta uza mensahenan atractivo pa gaña nan victimanan, pero nos mester keda alerta y no cay den nan trampa”.
