Na un horizonte scur cu pandemia ta crea pa situacion mundial y pa Aruba - *Cuanto placa Miembronan di Parlamento a gasta na Bonaire e siman aki? - *Delegacion Hulandes a uza IPCO pa atende nan responsabilidad directo pa Bonaire
ORANJESTAD (AAN) — Nubianan scur a forma e siman aki riba Aruba, caminda un Pueblo inocente cu dermasiado bez no ta capaz di realisa kico politiconan ta haci, a haya su mes cu mas problema.
Manera DIARIO a adverti, e siman aki den e lucha contra e pandemia Covid-19, Aruba a haya su mes na careda pa motibo di e condicionnan di tempo inclemente cu temporada di horcan a produci.
Aruba, sinembargo, no por a comprende, e mal tempo na cual Miembronan di Parlamento di Aruba tabata aporta na Bonaire, caminda placa di Pueblo di Aruba tabata wordo gasta pa e reunion di contacto entre Miembronan di Parlamento di Reino Hulandes, caminda placa di e paisnan den problema den Reino, ta wordo gasta na tur loke mester ta na “nivel” di representacion di Pueblo ora ta na interes di politiconan envolvi.
E berdad di hipocrecia enfrente democracia, sigur a wordo presenta na Bonaire, cu ta parti oficial di Hulanda y cu ta responsabilidad directo di e Parlamento (Tweede Kamer) y Senado (Eerste Kamer) di Hulanda.
E Miembronan di e dos colegionan cu ta representa Pueblo di Hulanda na nivel nacional, tin asuntonan directo pa atende cu Bonaire, cu ta teritorio Hulandes (bou Gobierno Hulandes) directamente.
Pues e Miembronan di Parlamento y Senado di Hulanda cu a atende na e “onderonsje di Reino” e siman aki na Bonaire, no a bay gasta placa di Hulanda na prome luga pasobra nan kier a brasa nan coleganan di Aruba, Curacao y Sint Maarten. Nan tabata tin asuntonan directo pa atende na Bonaire, caminda prueba a wordo duna na e paisnan den Reino, con grandi e amor di politiconan di un pais por ta.
Mayoria di Arubiano no ta ni na haltura cu tin un reunion di IPKO. Un cantidad grandi di ciudadano Arubano no ta ni na haltura kico ta IPKO cu dos bez pa aña ta causa gastonan pa e poblacionnan di paisnan di Reino Hulandes.
IPKO ta e organo di contacto Inter Parlamentario di Reino Hulandes. El a wordo organisa pa e representacionnan di Pueblo tin contacto cu otro y asina discuti asuntonan importante cu otro.
Na inicio y meymey di aña, e representantenan eligi di e paisnan di Reino ta bini hunto pa trata cierto temanan, cu hopi bez ta keda pega den transhi politico.
Pa e miembronan di Parlamento por reuni, Pueblo di e paisnan di Reino mester gasta placa na pasashi, na estadia, transportacion, etc., etc., etc., di un cantidad grandi di Miembronan di Parlamento cu mester yuda otro comprende e necesidad na yega na acuerdo.
Dos reunion di Reino cu ta trece gasto enorme pa paisnan, cu ta den situacion financiero enorme cu tin un impacto riba condicionnan di bida di e ciudadanonan cu mester paga pa tur gasto pa e reunionnan.
Pakico tur miembro di Parlamento mester bay?
Tristo ta, cu durante e pandemia a keda claramente demostra cu, mescos cu ta e caso cu tur organisacion priva, por a reuni via internet sin gasto pa pueblonan.
Awe un abuso ta wordo comete contra Pueblo di Aruba y DIARIO mester protesta contra e encuentro na Bonaire caminda entre otro lo a papia di Coho y asuntonan cu ya a keda atras!
Kende ta controla kico Parlamento ta haci cu placa di Pueblo? Un pregunta cu awe mas cu nunca ta bira valido ora un Pueblo cu ta hoga den un situacion financiero historico den un situacion mundial cu un horizonte sumamente scur, ta mira su representantenan cu e ta paga, gasta placa di Pueblo pa reunionnan cu sigur por a sigui via computer manera for di 2020 ta e caso!
Un abuso colectivo Parlamento a comete pero awor cu tur ta parti di e “Gran Encuentro na Bonaire” tur ta cera boca.
