ORANJESTAD (AAN): Manera cu DIARIO a trece dilanti caba, Minister Evelyn Wever-Croes a confirma cu e rumor cu a circula cu e isla lo bay ricibi refugiadonan di Afghanistan, ta incorecto.
El a djis bisa cu Aruba no por duna yudanza na refugiadonan di Afghanistan. Debi cu no tin capacidad di carga nan riba e isla.
Esaki ta algo di sentido comun tambe, mirando e hecho cu e isla no por a duna tampoco man mas na refugiadonan Venezolano. Si bo ricibi mas refugiado, bo tin di mester di mas infrastructura y demas logistica, incluyendo e barera di mas grandi cu lo ta e lenguahe.
“Aruba no por duna refugio na Refugiadonan di Afghanistan! Nos ta laga esaki den man di e paisnan grandi cu por carg’e,” prome Ministro a declara.
El a bisa cu tur hende por mira kico ta sosodiendo na Afghanistan y unico cos cu e isla por haci ta tene nan den oracion y pensamento y cu pronto cosnan por stabilisa y normalisa. Hopi persona ta purba di scapa y huy na e momentonan aki y varios pais ta yudando nan den esaki.
Pa Aruba cu ta asina leu, bo ta wak e na television y bo por bira e canal y wak otro cos. Pero e Afganonan ta biba den dje y e ta un situacion hopi dificil.
“Nos oracion ta cu tur e hendenan aki,” Prome Ministro a bisa.
El a enfatisa cu e rumor cu ta circula cu Aruba lo ta un di e paisnan cu lo duna e auxilio na un grupo di 300-400 persona di Afghanistan como refugiado, no ta corecto den ningun sentido di palabra. Aruba no ta un di e paisnan yama pa duna refugio na e refugiadonan di Afghanistan.
Paisnan grandi, manera por ehempel Colombia, si ta un di e paisnan mas cerca cu ta duna e refugio ey pendiente e entrada di e personanan aki na Merca. “Pues nos ta laga esaki den man di e paisnan grandi cu por carg’e”, Prome Minister a expresa.
Ademas, Prome Minister a sigui bisa, Aruba cu e situacion di Venezuela ya caba a pasa un quotum hopi grandi di persona cu ta aki nan cu a huy di nan pais caba y Gobierno ta purba di atende cu e retonan ey caba.
Mirando tur e retonan cu Aruba tin aworaki ta enfrentando, e pandemia cu nos ta den y e situacion critico di Covid, laga nos keda cu cabes friew y no cay den e tipo di temanan aki y plama rumornan pa trece panico of confusion den pueblo.
