ORANJESTAD (AAN) – Minister Presidente mr. Evelyn Wever-Croes, den conferencia di prensa a reitera cu debi cu Hospital a bati alarma, diasabra ultimo,
gobierno y Crisis Team a bin cu medidanan un poco mas estricto, relaciona cu e pandemia di Covid-19.
El a remarca cu ainda e situacion na Hospital ta critico, y pesey mester sigui mantene e medidanan aki, pero e ta spera cu ya cerca di e fin di siman cu ta biniendo, lo por cuminza mira un otro situacion.
El a enfatiza cu esey no kiermen cu e medidanan lo wordo flexibiliza pasobra no ta asina.
“Pero si e ta duna nos mas confianza cu dia 1 di September, cu nos tabata kier pa nos muchanan bay scol bek, lo ta un fecha realizable”, e mandatario a comenta.
Mirando cu tin hopi hende den e area di deporte cu ta lamenta cu actividadnan deportivo a wordo para atrobe, e mandatario no ta garantiza cu prome cu 1 di September, si e casonan di covid-19 lo a baha bon, lo por tin actividad deportivo bek. E mandatario a bisa cu gobierno y Crisis Team ta evaluando caba, e medidanan cu a tuma diasabra ultimo. El a reitera cu cada tres dia nan por wordo cambia y diahuebs awo lo tuma un decision si ta sigui mantene nan pa e siguiente dianan, esta pa fin di siman.
“Pero cu tur honestidad mi ta kere cu prome cu 1 di September nos no ta bay weita mucho cambio. Despues di 1 di September si lo por permiti deporte, aunke cierto competencianan y cu cierto limitacionnan, pero si lo cuminza bay bek na cierto normalidad”, e dignatario a subraya.
