Directora di Departamento di Impuesto Aruba (DIMP), Drs. Luenne Gomes-Pieters
ORANJESTAD (AAN): Directora di Departamento di Impuesto Aruba (DIMP), Drs. Luenne Gomes-Pieters, den un entrevista recien a duna di conoce cu tin dos proyecto grandi andando na Departamento di Impuesto. Ta trata di digitalisacion y automatisacion di procesonan y e digitalisacion di cuenta cu contribuyentenan tin na DIMP.
Señora Gomes-Pieters a indica cu e digitalisacion di cuenta di clientenan por ser compara cu ora un persona mira su estado di cuenta na banco. Den un futuro cercano, e ta posibel cu un contribuyente, incluso un contribuyente individual, por mira su estado di cuenta na Departamento di Impuesto.
Cu estado di cuenta, e directora di DIMP ta splica, ta ora cu un contribuyente tin un cuenta habri na cobransanan di impuesto cu ainda no a vence y loke tin ainda den bezwaar. Cu e opcion aki tur contribuyente por haci un areglo di pago online, completamente digital y riba su mes. E contribuyente por mira su estado di cuenta y si esaki tin grondbelasting of erfpacht habri, e por scoge su areglo cu opcionnan varia di pago. Departamento di Impuesto por determina e maximo di pago, por ehempel te 12 termino di pago. E contribuyentenan por mira tambe e pagonan cu el a haci sea na casa of online.
Riba kehonan cu tin ora di paga online, señora Pieters a sigui bisa cu den futuro cercano contribuyentenan por mira e comprobantenan y con e pagonan ta ser registra den sistema di e departamento y riba e cobransanan of medio di impuesto corespondiente.
“E proyecto aki ta uno hopi grandi na unda cu nos especialistanan ta envolvi den cada paso pa make sure cu nos contribuyentenan ta haya un bon bista. Y e proyecto ta user friendly”, señora Pieters a asigura.
Te cu awo comerciantenan tin un bon experiencia cu e portal digital di impuesto y pronto contribuyentenan individual tambe por registra pa nan por mira nan estado di cuenta via e portal di Bo Impuesto.
“Mi ta sigura cu nos clientenan ta haya un bon producto y un bon bista caminda cu porfin e contribuyente ta den control di su mesun asuntonan di impuesto. Esaki lo desminui e criticanan tambe di clientenan cu ta yama Departamento di Impuesto y no ta haya contesta riba nan asuntonan di impuesto”, señora Pieters a remarca.
Debi na e fluho actual di trabou y e capacidad limita di funcionarionan publico na Departamento di Impuesto, señora Pieters a agrega, no por atende tur cliente. Ya caba e sistema di digitalisacion aki ta ser haci na diferente departamento di impuesto na otro parti di mundo. Y pronto esaki lo ta posibel na Aruba tambe.
