Aclareacion
ORANJESTAD (AAN): Si bo tin un cacho brabo na bo cas, y bo no sa kico pa haci cu ne. Awor na Aruba tin ‘Centro di Control di Cacho’, esta CCC.
Nan tey pa asina haci analisis di cachonan brabo, y asina traha riba un plan y duna conseho.
Esey ta loke Nathy Ventura, di Centro di Control di Cacho, a splica den un entrevista cu DIARIO.
Ora cu un cacho brabo wordo treci cerca nan, e ta nan trabao e ora ey pa wak e situacion di e cacho, evalua si nan ta hopi agresivo y tin cu wordo poni drumi, y tin ora basa riba e situacion si e cacho tin doño y esaki riba su mes por tuma e decision di pone e cacho drumi.
Tambe Nathy Ventura a agrega cu tin situacion unda un hende tin un cacho brabo na cas, y pa un descuido el a sali di cura. En principio e doño tin derecho di hay’e bek, bao e condicion cu e ta pidi un vergunning pa “Gevaarlijke Hond” cerca Servicio Veterinario.
Berdad segun Nathy Ventura a splica, cada situacion di cacho ta diferente. Tin incidentenan unda cacho a morde hende, y esaki hopi biaha ta sosode door di un descuido, un fayo den e cura of e porta, pero na final di dia nan ta bestia cu con cu bay bin, ta haya nan caminda di sali.
“Si como doño responsabel, bo ta haya e caminda corecto pa bo haya bo mascota bek. Pero bo mester ta extra cuidadoso pa cuida e cacho”, el a comenta.
Manera ta conoci tin ley di cacho, y autoridadnan local ta atende casonan cu a socede riba caya, y como cu e ta bira un peso grandi pa Polis of Bario Regisseur, e ora Centro di Control di Cacho ta e contact directo pa coopera den e asuntonan aki. Expertonan di CCC ta hasta bay na e adresnan pa mira e situacion, check e actitud y agresividad di e animal. E ta un proceso cu ta dura hopi pa yega na un decision, y ta tene consulta direct cu e doño, y tambe fundacionnan local, manera Luna Foundation, Crijojo Trappers, AWAA, Sargeant Pepper, Nine Lives, kendenan ta traha direct cu CCC.
Tin e opcion si acaso e doño di e cacho no tabatin ningun mal intencion (como cu algun doño na Aruba no tin suficiente educacion y suficiente informacion con pa handle un cacho agresivo), e ora den cooperacion cu e Fundacionnan local ta presenta e caso cerca nan pa check si nan kier a duna un man, y eynan e ta bira un berdadero teamwork di nan tur como Centro di Control di Cacho, Fundacionnan, y Autoridadnan local pa atende e problema di cacho brabo riba caya of na cas.
