A resulta cu tin prohibicion pa Jayburtt drenta Salubridad Publico

Minister Mervin Wyatt-Ras ta reacciona riba declaracion di Jayburtt Dijkhoff

ORANJESTAD (AAN) Diamars mainta, Minister Mervin Wyatt-Ras, encarga cu Salud Publico, Asuntonan Social, Cuido di Adulto Mayor y Maneho di Adiccion, a reacciona encuanto un declaracion haci pa mr.Dhr. Jayburtt Dijkhoff.

“Mi kier a reacciona riba un entrevista cu mi a tuma nota di dje, di señor Jayburtt Dijkhoff, unda cu el a trece padilanti diferente insinuacion, pa loke ta trata funcionamento di diferente entidad y departamentonan. Y pa aclarea mi tin cu indica cu señor Jayburtt Dijkhoff a wordo prohibi pa drenta su oficina pa motibo cu tabata tin acusacionnan, pa loke ta trata algo cu el a trece dilanti riba Facebook, pa plataforma di informacion y mi tin cu laga pueblo mira esaki”, e mandatario ta señala.

   E minister cu un copia imprimi den man, a splica cu esaki ta un post cu Dijkhoff a haci propagandando cu e ta traha pa comunidad, y tambe unda e ta bisa cu si ta desea pa consulta cu ne, e por yud’e y intermedia pa e persona su derecho y pueblo su derecho no wordo kita of viola, y e ta menciona e prijs cu su consulta ta costa.

   “E ta un propaganda pa locual cu e ta haci, y como profesional, mi tin cu bisa, y cu como persona na cabes di Instituto di Calidad, cu ta un Instituto hopi prestigioso, cu a wordo lanta a base di ley, y cu mester salvaguardia e calidad di cuido na Aruba, e no por ser permiti pa haci un anuncio asina ey”, Minister Waytt-Ras a indica.

   Señor Jayburtt Dijkhoff a entrega un peticion na Ministerio, p’asina e por haci e tipo di trabao aki. “Y mi  persona como minister no a entrega e contesta ainda, pasobra mi a manda e peticion aki pa un conseho di e Bureau di Integridad. Pakico? Pasobra mi no a sinti mi bon pa un persona cu ta na cabes y mester garantiza e calidad di cuido, tambe por duna e servicio eynan. P’esey e no a haya e contesta ainda. Y asina mes, el a bay e ora ey riba facebook anuncia, propaganda su servicionan. Esey no ta cuadra pasobra den e Instituto ey e tin funcion ehemplar”, e dignatario a splica.

   El a agrega cu door di esey el a haya e conseho di DRH, cu ta e entidad concerni, pa no acepta. Despues el a tuma nota di un carta di señor Dijkhoff, cual no ta oficial ainda, unda el a tuma su retiro wardando e tempo cu e bira oficial.

   E mandatario a señala cu Ministerio di Salubridad Publico ta sigui trata e retonan di salubridad cu seriedad, integridad y transparencia, a base di ley y via su canal oficial.