Pronto no ta mesun barionan lo keda perde coriente mas

ORANJESTAD (AAN): Recientemente e planta di WEB Aruba NV hunto cu NV Elmar a pone e sistema di Intelligent Load Shedding (ILS) online pa 63 areanan “veld” di nos isla, den operacion.

   Pa splica kico esaki ta, ta bon pa mustra cu semper na momento cu surgi un fayo den produccion di energia na WEB, en realidad ta surgi un desbalance entre suministro y demanda di coriente. Pa evita cu e isla completo keda sin coriente, 
na e momento ey ta necesario pa temporalmente interumpi suministro di coriente pa algun area riba nos isla.

   Antes Aruba tabata dividi den 8 area of ‘veld’ grand di WEB, cual tabata keda sin coriente na momento di un brown out (interupcion parcial).

   SISTEMA NOBO: Awor cu IGMS y ILS ta online, a amplia e cantidad na 63 veld chikito di NV Elmar. Esaki ta pone cu ora cu surgi fayo, menos area, y pues menos cliente ta keda afecta.

   Cu IGMS y ILS tambe, WEB Aruba NV por recupera di e fayo mas rapido, cu consecuencia cu clientenan no ta keda largo sin coriente.

   E sistemanan automatico aki ta mitiga posibel impacto rapidamente y ta impacta e suministro di coriente lo menos posibel. Otro beneficio ta cu unabes cu ILS kita un di e areanan en cuestion, e mesun area lo no keda afecta den un siguiente brown out. Asina e areanan afecta lo no semper ta e mesunnan durante siguiente brown outnan. Esaki ta otro logro exitoso den e proyecto IGMS/ILS cu poco poco ta yegando su fase final!