Hose Figaroa di FTA: ---* Situacion ta crea hopi inseguridad bao di e trahador
ORANJESTAD (AAN): Hose Figaroa, Presidente di Sindicato di trahadornan FTA a duna di conoce cu loke nan ta a experencia durante añanan largo ta cu for di aña 2013 tabata tin cambionan pa loke ta e regulacion di uitzendbureau.
Berdad e leynan a wordo aproba y nan a drenta na vigor, pero nunca nan a wordo implementa. Tur e tempo aki a puntra pa un lista di empresa cu a haya un boet pasobra nan no a cumpli cu e legislacion ey .
Segun Figaroa, no tin e 'man craft' suficiente pa haci e tipo di controlnan ey y sigur pa duna e boetnan necesario na momento cu no ta cumpli.
El a agrega cu a crea un 'gap' pasobra tin e 'uitzendbureaunan', pero aworaki tin tambe e sub-contratacion (cu tecnicamente no ta un 'uitzendbureau'), pero cu ta creando un problema grandi.
Tin un hotel aki na Aruba cu mas di 80% di nan personal cu no ta den servicio di e hotel directamente, pero cu ta den servicio via di un compania di sub-contratacion (un di tres ta tuma nan den servicio), a splica.
Esaki toch ta algo legal, pero door di hacie asina ta crea un inseguridad bao di e trahador pasobra mañan si algo pasa e trahador no por reclama e compania cu laboralmente e traha p'e, sino cu e tin cu hacie cu e compania cu legalmente e ta den servicio di dje, Figaroa a indica.
Por ehempel. si un persona ta traha na hotel A, e no ta den servicio di hotel A, aunke cu e ta desplega su trabao na hotel A, pero e ta den servicio di un compania B, cu ta brinda servicio na hotel A.
Na Mexico, esaki ta un problema enorme unda cu por ta un compania cu tin 200 mil hende ta traha, solamente 5 ta fiho den servicio di e compania mes. Tur e resto ta den servicio di un di tres compania, a señala.
"Tin companianan cu kier haci business pero no kier tuma e riesgonan di haci business", Hose Figaroa a remarca. Nan kier evita, cu por ehempel mañan un trahador ta reclama nan. Pesey nan ta pasa e trahador ey pa un otro compania contratista y ora cu tin problema, e subcontratista tin cu deal cu nan trahador, pasobra nan no ta mira e persona aki como nan trahador sino como trahador di e subcontratista, a bisa.
Na Mexico, por ehempel, e leynan a wordo modifica di tal forma cu ta limita con hopi un empresa por haci uzo di e tipo di construccionnan aki di tercerisacion, pasobra esaki ta crea problema, a señala.
Hopi biaha e tipo di companianan mes, e unico trabao cu nan tin ta paga e trahador, pero pa loke ta e resto no tin nada mas.
Loke a sosode na Hulanda, a agrega, ta cu na dado momento cu tabata tin flexibilisacion, cu a bay for di man, practicamente ningun hende no tin ningun empleo fiho mas locual ta trece cu ne cu e hendenan aki no por inverti, bay banco pa pidi un hipoteca pa cumpra un cas of un auto pasobra nan no sa si otro luna nan lo keda sin trabao, asina Hose Figaroa a splica recien durante e Entrevista di Dia cu Aldrich Croes na e radioemisora Hits100 FM.
