Segun Maikel Gomes di BCI:
ORANJESTAD (AAN): E plan di Bureau City Inspector y di Ministerio di Asuntonan General pa bakinan di sushi den bario lo conoce cambio e aña aki. Maikel Gomes di BCI a duna di conoce cu e servicio di ‘Baki den Bario’ lo bin den un concepto diferente na unda cu lo pone bakinan permanente den cierto puntonan di Aruba. Segun Gomes, ainda no ta conoci cuanto baki lo pone pero el a menciona cu lo ta e cantidad necesario. Tampoco tin un fecha ki dia lo cuminsa cu e proyecto aki. E supervision pa e bakinan aki ta bay keda bou di supervision di BCI.
E intencion ta pa tene tur e desperdicio separa y lo tin baki disponibel pa palo, plastic, hero etc., menos asbestos cu ta cay bou di DTI.
Señor Gomes a remarca cu BCI lo bay tuma mas ploeg den servicio y ta wardando pa e presupuesto keda cla pa mas ploeg drenta pa haci e trabaonan necesario cu ta bin extra cu lo traha e den e orarionan di 6’or di mainta te cu 6’or di atardi. Despues di e orario ey, lo tin security guard pa cuida e luga anochi.
Gomes a tuma e oportunidad di e entrevista cu DIARIO pa conscientisa comunidad pa no tira e sushi acumula den mondi. A tuma nota cu ciudadanonan ta bolbe cuminsa tira sushi den mondi. Esaki ta daña nos mondinan, nos ecosistema y ta tuma tempo, trabao y hopi placa di pueblo pa haci e mondinan limpi bek.
